საქართველოს შინაგან საქმეთა მინისტრი მიიჩნევს, რომ საგამოძიებო უწყებას არ ჰქონდა საფუძველი, დაეკავებინა 22 მაისს, კორცხელის საარჩევნო უბანთან ჩხუბში მონაწილე პირები. ამის შესახებ მინისტრმა დღეს, 26 მაისს, ვარდების მოედანზე გამოფენის დათვალიერებისას განაცხადა:

"მე ერთი თხოვნა მექნება ყველას მისამართით, ზედმეტი ემოციებისგან გათავისუფლდეს ყველა და დაელოდოს გამოძიებას. მე კიდევ ერთხელ გეუბნებით, გამოძიებას აქვს თავისი პროცედურები, რომელიც აუცილებლად დაცული უნდა იყოს. ჩემი განცხადების შემდგომ სპორტსმენები თვითონ გამოცხადდნენ სამინისტროში, ითანამშრომლეს გამოძიებასთან. გამომდინარე აქედან, მათი დაკავების საფუძველი მე და გამოძიებას, აღარ გვქონდა. მიუხედავად ამისა, მათი პასუხისმგებლობის საკითხი დღის წესრიგიდან არ მოხსნილა. დაველოდოთ გამოძიებას და ნუ შევქმნით აჟიოტაჟს არაფრის გამო".

22 მაისს, კორცხელის საარჩევნო უბანთან მისულ ნაციონალური მოძრაობის წევრებს თბილისიდან ჩასული სპორტსმენები ფიზიკურად დაუპირისპირდნენ. როგორც მათ განაცხადეს, ნაციონალური მოძრაობის წევრებმა შეურაცხყოფა მიაყენეს და პროვოკაციაზე წამოაგეს, რასაც მოჰყვა მათი რეაქცია.