მიხეილ სააკაშვლის ადვოკატის, ბექა ბასილაიას განცხადებით, ექსპრეზიდენტის ფიზიკური მდგომარეობა უფრო და უფრო მძიმდება. ბასილაიას თქმით, ფარისევლობაა, როდესაც იუსტიციის სამინისტრო სააკაშვილის ჯანმრთელობის მდგომარეობის მონიტორინგისთვის კომისიას ქმნის და ამავე დროს, პირად ექიმს მისი მონახულების საშუალება არ ეძლევა.

"ის არის მორალურად ძალიან მხნედ, თუმცა ფიზიკური მდგომარეობა მისი, შიმშილობის დღეების ზრდის გათვალისწინებით, უფრო და უფრო რთულდება. შესაბამისად, ძალიან მნიშვნელოვანია, რომ მის პირად ექიმს მიეცეს ბოლოს და ბოლოს მისი მონახულების შესაძლებლობა. იუსტიციის სამინისტრო საუბრობს რაღაც კომისიაზე, კი, არ არის ცუდი, რომ ქმნიან ამ კომისიას, მაგრამ მის პირად ექიმს რომ არ აძლევენ შესაძლებლობას მიხეილ სააკაშვილის მონახულების, ეს არის პიდაპირი ფარისევლობა", — აცხადებს ადვოკატი.

13 ოქტომბერს იუსტიციის მინისტრმა, რატი ბრეგაძემ სამინისტროში გამართული შეხვედრის შემდეგ განცხადა, რომ ექსპრეზიდენტ მიხეილ სააკაშვილის ჯანმრთელობის მდგომარეობის მონიტორინგისთვის ექიმების მულტიფუნქციური ჯგუფი შეიქმნა. მისი თქმით, იმისთვის რომ ამ ჯგუფმა სააკაშვილთან იმუშაოს თავად ექსპრეზიდენტის თანხმობაა საჭირო. შეხვედრას იუსტიციისა და ჯანდაცვის მინისტრებთან ერთად ესწრებოდნენ სახალხო დამცველი, ნინო ლომჯარია და დეპუტატები, მათ შორის, ადამიანის უფლებათა დაცვის კომიტეტის თავმჯდომარე, მიხეილ სარჯველაძე და ჯანდაცვის კომიტეტის თავმჯდომარე, დიმიტრი ხუნდაძე.