ქართული ოცნების დეპუტატის, სოზარ სუბარის თქმით, არ აქვს მნიშვნელობა, რამდენი ადამიანი მოითხოვს მიხეილ სააკაშვილის გათავისუფლებას, როგორც ქვეყნის შიგნით, ასევე, ქვეყნის გარეთ, რადგან ხელისუფლება მხოლოდ ქვეყნის კონსტიტუციით მოქმედებს.

"აბსოლუტურად არ აქვს მნიშვნელობა, რამდენი ადამიანი იდგება ქუჩაში ან რამდენი ადამიანი მოითხოვს ქვეყნის გარედან ამ ბელადის გათავისუფლებას, ჩვენ ვმოქმედებთ საქართველოს კონსტიტუციით, საქართველოს კანონით და ყველა დამნაშავე მოიხდის სასჯელს ბოლო დღემდე", — განაცხადა სუბარმა.

სუბარი ამტკიცებს, რომ მიხეილ სააკაშვილის გათავისუფლების მოთხოვნით გამართულ აქციაზე იმაზე ბევრად ნაკლები ადამიანი გამოვიდა, ვიდრე ამას სააკაშვილი ელოდა, რისთვისაც ექსპრეზიდენტი იმედგაცრუებული უნდა იყოს.

"დემოკრატიულ ქვეყანაში აქცია არის ძალიან ნორმალური, ბოლო 9 წლის განმავლობაში ნაციონალური მოძრაოაბა 2 წელიწადში ერთელ ახერხებს და აკეთებს თავისი ამომრჩევლების მნიშვნელოვანი ნაწილის მობილიზებას, თუმცა, მათი ლიდერი, როგორც ისინი უწოდებენ, თუ ბელადს უწოდებენ, ძალიან იმედგაცრუებული უნდა იყოს, ეგონა, რომ დახვდებოდა 100 და 300 ათასი ადამიანი ქუჩაში და მოითხოვდა მის გამოშვებას, ნახა, რომ ძალიან ბევრად არის შემცირებული იმ ადამიანების რიცხვი", — აღნიშნა სუბარმა.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა, სადაც ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.