ფიქრობთ, რომ საკმარისად ბევრი თრილერი, კრიმინალური ისტორია ან პოლიტიკური დრამა გაქვთ ნანახი? რეალური ცხოვრება მაინც გაგაოცებთ მოულოდნელი სიუჟეტებით.

სახელმწიფო მნიშვნელობის გასაიდუმლოებული ინფორმაციის გაცემის ბრალდებით ამერიკაში წყვილი დააკავეს. ამ შემთხვევას განსაკუთრებულ ელფერს ის სძენს, რომ საქმეში მიწისთხილის კარაქის სენდვიჩი ფიგურირებს. თუ რატომ, ქვემოთ მოცემულ ისტორიაში გაიგებთ.

BBC-ის ინფორმაციით, FBI-მ დასავლეთ ვირჯინიაში სამხედრო-საზღვაო ფლოტის ყოფილი ინჟინერი, ჯონათან ტობი და მისი ცოლი, დაიანა, რომელიც მასწავლებელია, სახელმწიფო მნიშვნელობის ინფორმაციის სხვისთვის უკანონოდ გადაცემის მცდელობის ბრალდებით დააკავა.

ბრალდების თანახმად, ცოლ-ქმარი ცდილობდა, რომ ატომური წყალქვეშა ნავის დიზაინი გაემხილათ, მათი წარმოდგენით, სხვა ქვეყნის მოქალაქისთვის, რომელიც, სინამდვილეში, აშშ-ის სამართალდამცავების ფარული აგენტი იყო და FBI-სთვის მუშაობდა.

ფოტო: US NAVY/THIEP VAN NGUYEN II

ჯონათან ტობი ამერიკის სამხედრო-საზღვაო ძალებში მუშაობდა და გასაიდუმლოებულ ინფორმაციაზე ჰქონდა წვდომა. სამართალდამცავების განცხადებით, ის დაახლოებით ერთი წლის განმავლობაში ცდილობდა, რომ ეს ინფორმაცია გაეყიდა.

საბოლოოდ, მან მიაღწია შეთანხმებას და ინფორმაციის უცხო პირზე გადაცემას $100 000-ის სანაცვლოდ აპირებდა.

კონკრეტული შეთანხმების შემდეგ, ჯონათანმა მის ხელთ არსებული ინფორმაცია მეხსიერების ბარათზე შეინახა, მიწისთხილის კარაქის სენდვიჩში ჩადო და ასე აპირებდა გარიგებულ პირთან, რომელიც რეალურად FBI-ს აგენტი იყო, საიდუმლო ინფორმაციის გადაცემას. ცოლს ის მეთვალყურეობისთვის იყენებდა, რათა არემარე დაეზვერა.

წყვილი მალე სასამართლოს წინაშე წარდგება.