თბილისის რესპუბლიკური საავადმყოფოს კლინიკური დირექტორი დევი ტაბიძე აცხადებს, რომ პანდემიის მეხუთე ტალღა დაიწყო და ვაქცინაციის პროცესი მინიმალური, პრაქტიკულად, განულებულია. მისი თქმით, კორონავირუსის უსიმპტომო ფორმების შემთხვევებმა იმატა, პაციენტები მძიმდებიან და ერთადერთი გამოსავალი კვლავ ვაქცინაციაა.

"სტარტი აიღო მეხუთე ტალღამ და ყველაზე მთავარი არის ის, რომ ამას ჩვენ შევხვდით მინიმალიზებული, შეიძლება ითქვას, რომ, პრაქტიკულად, განულებული ვაქცინაციის პროცესით. ეს არის ჩვენი ყველაზე მძიმე მდგომარეობა. ეს არის, პრაქტიკლუად, ვაქცინაციის ნულოვანი მდგომარეობა, იმიტომ, რომ ეს ციფრი არანაირ შედეგთან არ მიგვიყვანს, არაფერზე არ მეტყველებს და მიგვიყვანს მხოლოდ და მხოლოდ იმ შედეგთან, რომ გაიზრდება ინფიცირების რაოდენობა და გაიზრდება, შესაბამისად, ლეტალური გამოსავალიც.

პაციენტები მძიმდებიან, ძალიან იმატა უსიმპტომო ფორმებმა და ამ ყველაფერმა ერთიანად, სამწუხაროდ, მიგვიყვანა იმ ციფრებამდე, რა ციფრებიც დღეს გვაქვს. ეს არის მოცემულობა, ამას ვერ გავექცევით. ერთადერთი გამოსავალი გვაქვს — ვაქცინაცია და აცრები", — აცხადებს ტაბიძე.

გუშინ, 12 ოქტომბერს ჯანდაცვის მინისტრის მოადგილემ, თამარ გაბუნიამ განაცხადა, რომ მდგომარეობას მე-5 ტალღას ვერ დაარქმევდა და ჯერ მე-4 ტალღიდან არ გამოვსულვართ.

13 ოქტომბრის მონაცემებით, საქართველოში კორონავირუსის 4 837 ახალი შემთხვევა დადასტურდა, გამოჯანმრთელდა — 1 586, ხოლო გარდაიცვალა 26 ადამიანი.

რაც შეეხება დადებითობის მაჩვენებელს, 12 ოქტომბრის მდგომარეობით, დადებითობის დღიური მაჩვენებელი არის 9,79%, ბოლო 14 დღის მანძილზე — 6,95% ხოლო 7 დღის მანძილზე — 8,52%.

დაავადებათა კონტროლის ეროვნული ცენტრის ინფორმაციით, 13 ოქტომბრის მონაცემებით სულ ჩატარებულია 1 889 200 აცრა. სულ მცირე 1 დოზით ვაქცინირებულია 1 004 298 ადამიანი — მოზრდილი მოსახლეობის 35.3%, ხოლო სრულად ვაქცინირებულია 884 902 ადამიანი — მოზრდილი მოსახლეობის 31.0%. მათი განცხადებით, 12 ოქტომბერს აიცრა 6 837 ადამიანი.