ჯანდაცვის მინისტრის მოადგილე, თამარ გაბუნია ამბობს, რომ საქართველო, ჯერ კიდევ, კორონავირუსის მე-4 ტალღის ფაზაშია. მისივე თქმით, მნიშვნელოვანია, რომ დავუბრუნდეთ პირბადის აქტიურ გამოყენებას და გააქტიურდეს ვაქცინაციის ტემპი.

"ამას მე-5 ტალღასაც ნამდვილად ვერ დავარქმევდი, რადგან ჩვენ ჯერ მე-4 ტალღიდან ვერ გამოვედით და არის გარკვეული მერყეობა, რაც უნდა მოგვარდეს იმ გზით, რომ ისევ დავუბრუნდეთ პირბადის აქტიურ გამოყენებას, სოციალურ დისტანცირებას და რაც მთავარია, გააქტიურდეს ისევ ვაქცინაციის პროცესი", — თქვა გაბუნიამ.

თამარ გაბუნიამ ასევე თქვა, რომ კორონავირუსის შემთხვევების უჩვეულოდ მაღალი მატებაა. მინისტრის მოადგილის თქმით, ინციფირების ახალი შემთხვევების ზრდას ხელს უწყობს მობილობა და აცრების დაბალი მაჩვენებელი. გაბუნია ამბობს, რომ ქვეყანაში არ არის საკმარისი იმუნური ფენა იმისთვის, რომ ინფექციის გავრცელებას ხელი შეუშალოს.

12 ოქტომბრის მონაცემებით, საქართველოში კორონავირუსის 4 774 ახალი შემთხვევა დადასტურდა, გამოჯანმრთელდა — 1 623, ხოლო გარდაიცვალა 37 ადამიანი.