ექსპრეზიდენტ მიხეილ სააკაშვილის განცხადებით, საქართველოში "მესამე ქვეყნის" დახმარებით შემოვიდა. დაჭერამდე გადაღებულ მორიგ ვიდეოში, რომელიც მთავარმა არხმა ახლა გაავრცელა, სააკაშვილი ამბობს, რომ დასავლეთ საქართველოს ერთ-ერთ ტყეშია.

ექსპრეზიდენტის თქმით, ეს გზა აირჩია, რადგან თვითმფრინავი, რომლითაც ჩამოფრენას აპირებდა თბილისში ვერ დაჯდებოდა. მისი მტკიცებით, ქართული ოცნება გეგმავდა "ცუდი ამინდის" მიზეზით თვითმფრინავი სომხეთში ან აზერბაიჯანში დაესვა.

"მოგესალმებით ყველას დასავლეთ საქართველოს ერთ-ერთი ტყიდან. მე აქ აღმოვჩნდი მესამე ქვეყნის მეშვეობით. იმიტომ, რომ მას შემდეგ რაც გავიგე, რომ ივანიშვილმა გააგზავნა ღარიბაშვილი აზერბაიჯანში, სომხეთში, რომ ჩემი თვითმფრინავი, რომლითაც მოვდიოდი ორში საღამოს, უნდა გადაესროლათ სხვა ქვეყნებში, ვითომ საქართველოში აეროპორტებში ცუდი ამინდი იქნებოდა. გადავწყვიტე, ბევრად უფრო ნაკლებკომფორტული გზით, ჩემი მეგობრების დახმარებით სხვადასხვა ქვეყანაში საქართველოში შემოსვლა", — ამბობს ის.

ამ დრომდე უცნობია, რა გზით შემოვიდა სააკაშვილი საქართველოში. ენმ-ს წევრებისა და ადვოკატების განცხადებებიდან და გავრცელებული ვიდეოებიდან გამომდინარე, დაკავებამდე ის იმყოფებოდა ზუგდიდში, ფოთში, აბაშაში, ბათუმსა და თბილისში. გამოძიების ვერსიით, ის ქვეყანაში რამდენიმე დღით ადრე შემოვიდა იქამდე, სანამ თბილისში დააკავეს.