ბათუმში, საცხოვრებელი კორპუსის ჩამონგრევიდან დაახლოებით 12 საათი გავიდა, პრეზიდენტი კი მომხდარს არ გამოხმაურებია. დღის განმავლობაში პრეზიდენტის ადმინისტრაციის ვებ-გვერდზე მხოლოდ ერთი განცხადება გავრცელდა, სადაც ნათქვამია, რომ სალომე ზურაბიშვილი NATO-ს სამხედრო კომიტეტის თავმჯდომარეს, ადმირალ რობ ბაუერს შეხვდა.

შემთხვევის ადგილას ჩავიდნენ პრემიერმინისტრი, ირაკლი ღარიბაშვილი და შინაგან საქმეთა მინისტრი, ვახტანგ გომელაური. ადგილზე იმყოფებიან აჭარის მთავრობის თავმჯდომარე, თორნიკე რიჟვაძე და უმაღლესი საბჭოს წარმომადგენლები. მომხდარს გამოეხმაურა როგორც სამთავრობო გუნდი, ისე ოპოზიცია.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 12 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. ამ დროისთვის გამოყვანილია ორი ადამიანი, ორივე მათგანი ცოცხალია. ცნობილია, რომ ქალის მდგომარეობა უკიდურესად მძიმეა, კაცის ჯანმრთელობის შესახებ ინფორმაციის დაზუსტებას On.ge ამ წუთებშიც ცდილობს. გარდა ამისა, დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზი. შს მინისტრის თქმით, შესაძლოა, ეს ქვედა სართულზე მიმდინარე სამუშაოები იყოს, რომელსაც მესაკუთრეები აკეთებდნენ. თუმცა გომელაური დაძენს, რომ ჯერ გამოძიება მიმდინარეობს და ზუსტი ინფორმაცია არ აქვთ.

გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.