აჭარის მთავრობის თავმჯდომარე, თორნიკე რიჟვაძე აცხადებს, რომ ყველაფერი კეთდება ბათუმში, ჩამონგრეული კორპუსის ქვეშ დარჩენილი ადამიანების გადასარჩენად. რიჟვაძე, ჯერჯერობით, თავს იკავებს ჩამონგრევის მიზეზებზე საუბრისგან.

"ყველაფერი გაკეთდება, რომ გადარჩნენ იქ დარჩენილი ადამიანები. ვერსიებზე, წინასწარ, რა თქმა უნდა, ვერ ვისაუბრებ [...] სრული ინფორმაცია არ გვაქვს, მიმდინარეობს მუშაობა, როგორც სამაშველო ღონისძიებების გატარება, ასევე ხდება კონტაქტი იქ დარჩენილი და იქ მცხოვრებ ადამიანებთან.

ვერ გეტყვით ვერსიებზე, ყველაფერს გამოძიება დაადგენს. ახლა, მთავარია, ვუშველოთ იმ ადამიანებს. ვერსიები ბოლოსთვის", — განაცხადა თორნიკე რიჟვაძემ.

თორნიკე რიჟვაძე ამ წუთებში შემთხვევის ადგილზე იმყოფება.

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. აჭარის ჯანდაცვის სამინისტროს ინფორმაციით, ამ დროისთვის ნანგრევებიდან ბავშვია ამოყვანილი. ის საავადმყოფოშია გადაყვანილი.

ამ წუთებში სამაშველო სამსახური მუშაობს ნანგრევების ქვეშ დარჩენილი ადამიანების გამოყვანაზე. მათი ნაწილი მაშველებთან კონტაქტზე გამოვიდა.

აჭარის საპატრულო პოლიციაში აცხადებენ, რომ დამატებითი ძალების მობილიზება მეზობელი რეგიონებიდან ხდება.