პენიტენციური სამსახური აცხადებს, რომ ექსპრეზიდენტ მიხეილ სააკაშვილს საკანში ტელევიზორიც აქვს და ლეიბიც. მათი თქმით, სიცრუეა ინფორმაცია იმის შესახებ, რომ ტელევიზორის მიწოდების პროცესი ხელოვნურად გაჭიანურდა. განცხადებაში წერია, რომ სააკაშვილი "ამ დროისთვის" ტელევიზორით სარგებლობს, თუმცა არ კონკრეტდება, როდის შეუტანეს.

"განვმარტავთ, რომ ბრალდებულმა/მსჯავრდებულმა ტელევიზორი შეიძლება შეიძინოს საკუთარი ხარჯით და ბარათზე ლიმიტით დაწესებული თანხით დაწესებულების ტერიტორიაზე არსებულ მაღაზიაში. სააკაშვილს ორშაბათს დაუმზადდა ბარათი, სადაც დაირიცხა ლიმიტირებული თანხა. სამშაბათს მან დაწესებულების მაღაზიაში აირჩია ტელევიზორი და შეკვეთა გაფორმდა. ამ დროისთვის მის მიერ შეძენილი ტელევიზორით საკანში სარგებლობს.

ტყუილია ასევე ის ინფორმაცია რომ თითქოს მიხეილ სააკაშვილს არ მიეწოდა ლეიბი, დაწესებულებაში შესახლებისთანავე კანონის შესაბამისად, მას გადაეცა პირადი მოხმარების ნივთები, რომელშიც შედიოდა თეთრეული, ასევე საბანი, ლეიბი და ბალიში", — ვკითხულობთ განცხადებაში.

უწყებაში ამბობენ იმასაც, რომ მიხეილ სააკაშვილს დაწესებულების ადმინისტრაციისთვის დამატებითი ლეიბის მოთხოვნის თაობაზე არ მიუმართვს.

პენიტენციურ სამსახურში განმარტავენ იმასაც, რატომ არ შეატანინეს მიქაელ ბოტკოველს ექსპრეზიდენტთან პატრიარქის გაგზავნილი სახარება. მათი თქმით, სახარებას ჰქონდა მოოქროვილი ელემენტები და თვლები და ბრალდებულს/მსჯავრდებულს ეკრძალება ფასეული ნივთების პენიტენციურ დაწესებულებაში ქონა. მათივე თქმით, სწორედ ფასიან ნივთების ნუსხაშია ყველა სახის ნივთი ან სამკაული, რომელსაც აქვს ძვირფასი გაფორმება.

გუშინ და დღეს სააკაშვილის ადვოკატებმა განაცხადეს, რომ მას საკანში საჭირო ნივთები არ აქვს და ტელევიზორის შეტანაზეც უარს ეუბნებიან. ადვოკატების თქმით, საკანში არ იყო ლეიბი და ექსპრეზიდენტს არც წიგნების შეტანის უფლებას აძლევდნენ.