რამდენიმე კვირის წინ ნეტფლიქსზე ახალი სამხრეთ კორეული სერიალის, Squid Game-ის პრემიერა შედგა. სერიალში 456 ადამიანი ერთმანეთს სასიკვდილო თამაშებში ფულადი პრიზის მოსაგებად ეჯიბრება. კალმარის თამაშმა მსოფლიოს ყურადღება გამოსვლისთანავე მიიპყრო. კალმარის თამაში ნეტფლიქსის ყველაზე პოპულარული არაინგლისურენოვანი სერიალია და მას პლატფორმის ყველაზე მასშტაბური პროექტის ტიტულსაც უწინასწარმეტყველებენ.

კალმარის თამაშის გამოსვლის შემდეგ არც ფანების საინტერესო თუ უცნაურმა თეორიებმა დააყოვნა. ტიკტოკზე, ტვიტერსა და რედიტზე უამრავი დამაინტრიგებელი ვერსია გაჟღერდა, რომელთაგან 5 ყველაზე პოპულარულს გაგაცნობთ:

1. მოთამაშე 001 სინამდვილეში გი-ჰუნის მამაა

ამ დასკვნამდე თეორიის ავტორები სერიალის რამდენიმე დეტალმა მიიყვანა. გი-ჰუნის თქმით, ბავშვობაში ცელქობისთვის მშობლები მკაცრად სჯიდნენ. 001 კი ადასტურებს, რომ ამის გამო მისი შვილიც ხშირად ისჯებოდა. მინის ბურთებით თამაშისას მოთამაშე 001 ამბობს, რომ ეს ადგილი მის საცხოვრებელს ჰგავს. გი-ჰუნი უდასტურებს, რომ ბავშვობაში თავადაც მსგავს ადგილას იზრდებოდა. თუ იმასაც გავითვალისწინებთ, რომ მინის ბურთების თამაშში ოჰ ილ ნამმა გი-ჰუნი გადაარჩინა, ეს თეორია არც ისე არარეალურად ჟღერს.

2. ამ შეჯიბრებაში არჩეული ფერი თამაშებში მონაწილის როლს განსაზღვრავს

ტიკტოკზე ერთ-ერთი ყველაზე პოპულარული თეორიის მიხედვით, თამაშებში კონკრეტული ადამიანის როლი მეტროში გამართულ შეჯიბრებაში მის მიერ არჩეული ფერით განისაზღვრება. პირველ ეპიზოდში გი-ჰუნი ცისფერ ბარათს ირჩევს, რის გამოც თამაშის მონაწილის როლს სთავაზობენ, თუმცა რა მოხდებოდა, წითელი ბარათი რომ აერჩია? თეორიის მიხედვით, ის ერთ-ერთი მცველი გახდებოდა.

3. ჰვან ჯუნ-ჰო ცოცხალია

ყველასათვის საყვარელი პოლიციელი, რომელიც ძმის პოვნასა და თამაშების ორგანიზატორების გამოაშკარავებას ცდილობს, ფანების აზრით, ჯერ კიდევ ცოცხალია. ამის ფიქრის საფუძველს ის გვაძლევს, რომ სერიალში პერსონაჟის სიკვდილში მხოლოდ მაშინ ვრწმუნდებით, როცა მის სხეულს საკუთარი თვალებით ვნახავთ (მოთამაშე 001 ამის საუკეთესო მაგალითია). თანაც თუ გავითვალისწინებთ იმას, თუ რამდენი პასუხგაუცემელი კითხვა დარჩა ჰვან ჯუნ-ჰოს, სულაც არაა გამორიცხული, რომ პოლიციელი საკუთარი ტელეფონივით გამძლე აღმოჩნდეს, რომელიც, როგორც ჩანს, არასდროს ჯდება.

4. სერიალის ბოლო ეპიზოდში გი-ჰუნის წითელი თმა სიმბოლურია

ერთ-ერთი პოპულარული თეორიის თანახმად, ბოლო ეპიზოდში გამარჯვებული გი-ჰუნის მიერ თმის წითლად შეღებვა იმის მანიშნებელია, რომ შემდეგ სეზონში ის თამაშებში წითელ კომბინეზონში ჩაცმულ მცველად მოგვევლინება და მის ორგანიზატორებსაც დაუპირისპირდება.

5. გი-ჰუნის შვილის მამინაცვალს თამაშებთან რაღაც კავშირი აქვს

შავნიღბიანი კაცი, რომელიც მოგვიანებით პოლიციელის ძმა აღმოჩნდება, ტელეფონზე ყოველთვის ინგლისურად საუბრობს. გი-ჰუნის შვილის მამინაცვალს კი ოჯახი ამერიკაში მიჰყავს. ფანების ნაწილი თვლის, რომ სერიალის შემქმნელები ბავშვის ამერიკაში წაყვანის დეტალს სიუჟეტს უმიზეზოდ არ დაამატებდნენ. თეორიის მომხრეები მიიჩნევენ, რომ ბავშვის მამინაცვალს თამაშებთან, რომელიც შესაძლოა, ამერიკაშიც იმართებოდეს, გარკვეული კავშირები აქვს. ვინ იცის, იქნებ თამაშის ორგანიზატორებმა გი-ჰუნს სწორედ შვილის მამინაცვლის დახმარებით მიაგნეს?

ეს მხოლოდ მცირე ჩამონათვალია იმ თეორიებისა, რომლებსაც სერიალის ფანები სოციალურ ქსელებში ყოველდღიურად ავრცელებენ. მიუხედავად ამისა, სიმართლეს, ალბათ, მეორე სეზონის გამოსვლამდე ვერ გავიგებთ, რომელსაც, დიდი იმედი გვაქვს, გადაიღებენ.

ამავე თემაზე:

• ტესტი: Squid Game-ის რომელი პერსონაჟი ხარ?;
• 15 საუკეთესო ტვიტი, რომელიც Squid Game-ზე ჩვენს რეაქციებს ზუსტად აღწერს.