ცენტრალური საარჩევნო კომისიის ინფორმაციით, 2 ოქტომბრის არჩევნებთან დაკავშირებით უწყებაში 1702 საჩივარი შევიდა: 561 საჩივარი ადგილობრივმა სადამკვირვებლო ორგანიზაციებმა დაწერეს, 1 141 კი — საარჩევნო სუბიექტებმა.

1 702 საჩივრიდან 825 შემაჯამებელი ოქმების გადათვლას ან ბათილობას შეეხებოდა, დანარჩენი კი დისციპლინური პასუხისმგებლობის დაკისრებას და პროცედურულ ხარვეზებზე შესაბამისი რეაგირების მოთხოვნას.

ცესკოში აცხადებენ, რომ კენჭისყრის პროცედურებთან, ხმის დათვლასთან და შედეგების შეჯამებასთან დაკავშირებულ განცხადებს საოლქო საარჩევნო კომისიები განიხილავენ და გადაწყვეტილებას საჩივრის შეტანიდან 4 დღის ვადაში მიიღებენ.

"საჩივრების განხილვა საოლქო საარჩევნო კომისიებში 9 ოქტომბრის ჩათვლით გაგრძელდება და, რა თქმა უნდა, საარჩევნო ადმინისტრაცია მოგაწვდით დეტალურ ინფორმაციას თითოეულ საარჩევნო ოლქში განხილვების შედეგების თაობაზე", — აცხადებენ ცესკოში.

საოლქო საარჩევნო კომისიის მიღებული გადაწყვეტილება 2 დღის ვადაში შესაძლოა გასაჩივრდეს შესაბამის რაიონულ/საქალაქო სასამართლოში.