კორონავირუსით გარდაცვლილი 20 წლის ფეხბურთელის, ვახტანგ ჩარკვიანის მამამ, გაიოზ ჩარკვიანმა შვილის გარდაცვალების ფაქტთან დაკავშირებით პროკურატურაში სარჩელი შეიტანა. ის ექიმებს სიცოცხლის გაუფრთხილებლობით მოსპობას, გულგრილობას, ცრუ ინფორმაციის გავრცელებას და დაუდევრობას ედავება.

გაიოზ ჩარკვიანის თქმით, მისი შვილის მკურნალობისა და ჯანმრთელობის მდგომარეობასთან დაკავშირებით არასწორი ინფორმაცია გაავრცელეს — კერძოდ, გარდაცვლილი რესპუბლიკურ საავადმყოფოში 11 აგვისტოდან 10 სექტემბრამდე მკურნალობდა და არა 12 დღის განმავლობაში, როგორც ეს გაავრცელეს.

ამასთანავე, ჩარკვიანის განცხადებით, მან ადვოკატებთან ერთად კლინიკაში მოითხოვა პაციენტთან დაკავშირებული ყველა დოკუმენტი და ჩანაწერი, თუმცა განუცხადეს, რომ ამ დროის განმავლობაში კლინიკის ტერიტორიაზე ვიდეოკამერები გაუმართავი იყო და ჩანაწერები არ გაკეთებულა.

"როდესაც მე და ჩემმა კოლეგამ მივმართეთ რესპუბლიკურ საავადმყოფოს, შესაბამისად, მოვითხოვეთ ჩემი შვილის ყველა დოკუმენტაცია, ვითხოვდით ვახტანგ ჩარკვიანზე ვიდეოჩანაწერების ასლებს, სადაც დაფიქსირებული იქნებოდა მისი კლინიკაში შემოყვანის ფაქტი, შემოყვანის დღიდან განთავსებისა და გადაადგილების ამსახველი ჩანაწერები, ინტენსიური თერაპიის განყოფილებაში ყოფნის დროს მასზე გაკეთებული ყველა ჩანაწერი და მართვით აპარატზე ყოფნის სრული ჩანაწერები, სხვა პაციენტების სახის დაფარვით.

აღნიშნულთან დაკავშირებით, თურმე 11 აგვისტოდან 10 სექტემბრის ჩათვლით, ყიფშიძის სახელობის ცენტრალური საუნივერსიტეტო კლინიკის ტერიტორიაზე არსებული ვიდეოკამერები გამოსულია მწყობრიდან და არ ხდება ვიდეოჩანაწერის განხორციელება. ვსვამ ლოგიკურ კითხვას — ერთი თვის განმავლობაში, ვის ატყუებენ?", — აცხადებს ჩარკვიანი.

On.ge დაუკავშირდა რესპუბლიკურ საავადმყოფოს, თუმცა მათ ამ თემასთან დაკავშირებით კომენტარის გაკეთება არ ისურვეს.

კორონავირუსით გარდაცვლილი ახალგაზრდის მამის განცხადებით, მას არაერთი მტკიცებულება აქვს, მათ შორის შვილის მიერ გამოგზავნილი აუდიო და ვიდეოჩანაწერები და ყველაფერს პროკურატურას წარუდგენს. გაიოზ ჩარკვიანის თქმით, სხვა დეტალებზე მხოლოდ მას შემდეგ ისაუბრებს, რაც ჩვენებას ჩამოართმევენ.

10 სექტემბერს თბილისის რესპუბლიკურ საავადმყოფოში, 20 წლის ბიჭი კორონავირუსით გარდაიცვალა.