პარტია საქართველოსთვის წევრის, კახაბერ ქემოკლიძის თქმით, არ გამორიცხავს, რომ პრემიერმინისტრ ირაკლი ღარიბაშვილის ფეისბუქპოსტი ბიძინა ივანიშვილის მიერ იყოს ნაკარნახევი.

კითხვაზე, თუ რატომ შეეპარა მას ეჭვი იმაში, რომ წერილის ავტორი ღარიბაშვილი არაა, ქემოკლიძე საპასუხოდ ამტკიცებს, რომ თავის დროზე ის სხვების ხელწერასაც ანალიტიკურად აფასებდა და სწავლობდა.

"ანალიტიკაც ხომ იცით როგორ არის?! ცოტა სპეკულაციური სურნელიც უხდება, ასე ვთქვათ, ეს ნამდვილად სპეკულაციური დაშვებაა, მაგრამ მე არ გამოვრიცხავ, რომ ეს საერთოდ ბატონი ივანიშვილის მიერ ნაკარნახევი წერილი იყოს, ისევე, როგორც მგონია, რომ ბატონი სააკაშვილის საერთოდ ისტორია ბატონი ივანიშვილის ხელით არის შექმნილი დღევანდელ პოლიტიკურ გარემოში", — განაცხადა ქემოკლიძემ ფორმულას ეთერში.

მისივე თქმით, უკვირს, თუ როგორ მოიცალა ღარიბაშვილმა მსგავსი პოლიტიკური ვითარების პირობებში ამ წერილის დაწერისათვის.

"მე პირადად, ძალიან გამიკვირდა, რომ საერთოდ ქვეყნის პრემიერმინისტრმა თუკი ეს წერილი მისი დაწერილია საერთოდ, რაღა დაგიმალოთ, როგორ მოიცალა მსგავსი ტიპის წერილის ერთი მხრივ, დაწერაზე და შემდეგ ამ წერილის გასაჯაროებაზე, მაშინ როდესაც ქვეყანაში ძალიან ბევრი მნიშვნელოვანი ამბავი ხდება, მნიშვნელოვანი პრობლემებია და წესით და კანონით, ხელისუფლება უნდა მუშაობდეს", — თქვა მან.

6 ოქტომბერს პრემიერმინისტრმა ექსპრეზიდენტზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ფსიქიკურ ჯანმრთელობაზე ირონიულად საუბარი აძლიერებს სტიგმას და დისკრიმინაციულია. პრემიერმინისტრის მსგავსად, ამ საკითხზე დამცინავ კომენტარებს აკეთებენ ქართული ოცნების სხვა ლიდერებიც.