ლელოს წევრი, ლევან სამუშია ირაკლი ღარიბაშვილის ფეისბუქპოსტთან დაკავშირებით აცხადებს, რომ პრემიერმინისტრსა და ქართულ ოცნებას პნევმატური ჩაქუჩი უჭირავთ ხელში და ყოველდღიურად ფსკერს ხვრეტენ.

"ვისზე ლაპარაკობს საერთოდ ეს ადამიანი, ჩვენ ვნახეთ ივანიშვილმა როგორ გააგდო სავარაუდო კორუფციის დანაშაულით, შემდეგ მოიყვანა, დასჭირდა, დასჭირდა იმიტომ, რომ ყველაფერზე წამსვლელია და ყველაფრის შემსრულებელია, უსიტყვოდ. ახლა ეს სიტუაციაა, ამისთვის დასჭირდა და ამისთვის მოიყვანა. წარმოუდგენელი რამ ხდება.

პნევმატური ჩაქუჩი უჭირავს ხელში, შემიძლია გითხრათ, ღარიბაშვილს და ქართულ ოცნებას და ყოველდღიურად ფსკერს ხვრეტენ, არ უშველით, გამორიცხულია. საქართველოს მოქალაქეებმა ნათლად აჩვენეს თავიანთი პოზიცია და ერთადერთი დარჩენიათ მათ — ზიზღით ლაპარაკი საკუთარ ამომრჩეველთან, ეს არის ამომრჩეველთან დამოკიდებულება და ამ ზიზღით ცდილობენ ფონს გასვლას", — ამბობს სამუშია TV პირველის ეთერში.

დღეს, 6 ოქტომბერს პრემიერმინისტრმა, ირაკლი ღარიბაშვილმა მიხეილ სააკაშვილზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორსა და თეორიას იმაზე, თუ რატომ ჩამოვიდა ექსპრეზიდენტი ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ საკუთარი მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ამ თემაზე ირონიულად საუბარი აძლიერებს სტიგმას და დისკრიმინაციულია.

მანამდე, 3 ოქტომბერს ღარიბაშვილი იმედის ეთერში ციხეში მყოფ ექსპრეზიდენტ მიხეილ სააკაშვილს დაემუქრება და თქვა, რომ "წესიერად უნდა მოიქცეს", წინააღმდეგ შემთხვევაში მას სხვა მუხლები დაემატება.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს.

ამავე თემაზე: