"მდარე ჭორიკნის მარჩიელობაა", — ასე ეხმაურება პოლიტიკოსი, დავით ბერძენიშვილი პრემიერმინისტრ ირაკლი ღარიბაშვილის ფეისბუქპოსტს. მისივე თქმით, დღევანდელ პოლიტიკურ ვითარებაში ყველაზე სამარცხვინო სწორედ ქვეყნის პირველი პირი, პრემიერმინისტრი ღარიბაშვილია.

"მდარე ჭორიკნის მარჩიელობაა, რა უნდა ვთქვა, კომენტარის გარეშე. გამომიჩნდა ესეც ვანგა ახლა და თან ეპისტოლარულ ჟანრში გადავიდა, ის ხომ მიულოცა, ბიძინობა პირველ ოქტომბერს, ახლა ბიძინას მიბაძა წერილებით, ერთი თვითონ დაწეროს რა, მოიწვიეთ ერთი და უთხარით, რომ დაწერეთ–თქო და ერთი ვნახოთ, როგორ დაწერს და რამდენად გამართულად წერს და მეტყველებს და საერთოდ, რამე თუ იცის. ეს, რა თქმა უნდა, არ არის ადეკვატური დამოკიდებულება პრობლემის მიმართ ქვეყნის პრემიერის მხრიდან, ხელისუფლის მხრიდან", — ამბობს ბერძენიშვილი პალიტრანიუსის ეთერში.

გარდა ამისა, ბერძენიშვილი აღნიშნავს, რომ ექსპრეზიდენტი მიხეილ სააკაშვილი პოლიტპატიმარია. მისი განმარტებით, სააკაშილის წინააღმდეგ აღძრული სისხლის სამართლის საქმეების მიუხედავად, ის პოლიტიკური მოტივებითაა დაკავებული, რაც ქვეყანაზე კარგად არ აისახება.

"საერთოდ, როდესაც ქვეყნის ყოფილი პრეზიდენტი მის ქვეყანაში ამდენი წლის მერე, აშკარად, პოლიტიკური რევანშის მოტივებით არის ციხეში გამომწყვდეული, ეს სწორი არ არის, ეს კარგი არ არის, ეს ქვეყანაზე, რა თქმა უნდა, კარგად არ მოქმედებს. სრულად მკაფიოდ და პირდაპირ უნდა ვთქვა, რომ საკააშვილი, რა თქმა უნდა, არის პოლიტპატიმარი. პოლიტპატიმრობა არ ნიშნავს ანგელოზობას, მაგრამ პოლიტიკური მოტივებით დაკავებულია", — აცხადებს ბერძენიშვილი.

დღეს, 6 ოქტომბერს პრემიერმინისტრმა, ირაკლი ღარიბაშვილმა მიხეილ სააკაშვილზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორსა და თეორიას იმაზე, თუ რატომ ჩამოვიდა ექსპრეზიდენტი ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ საკუთარი მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ამ თემაზე ირონიულად საუბარი აძლიერებს სტიგმას და დისკრიმინაციულია.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს.