ლელოს ერთ-ერთი ლიდერის, გრიგოლ გეგელიას თქმით, პრემიერმინისტრ ირაკლი ღარიბაშვილის მიერ გამოქვეყნებული ფეისბუქპოსტი "ბატონი ბიძინას ეპისტოლურ ჟანრში კიდევრ ერთი პარანოიული ნარკვევია". გეგელია ამბობს, რომ ღარიბაშვილის განცხადების ერთადერთი მიზანი ოპონენტთა დემონიზებაა.

"მე ვფიქრობ, ირაკლი ღარიბაშვილმა დღეს შემოგვთავაზა ბატონი ბიძინას ეპისტოლურ ჟანრში კიდევ ერთი პარანოიული ნარკვევი, რომელსაც ობიექტურ რეალობასთან არავითარი საერთო არ გააჩნია. მე ვფიქრობ, ეს არის ძალიან უბადრუკი და ძალიან უნიჭო მცდელობა იმისა, რომ ახლა ქართული ოცნების ამომრჩევლის მობილიზება როგორღაც შეძლონ. [...] ერთადერთი მიზანი არის ოპონენტის დემონიზება, ქართული სახელმწიფოს ძლიერი სახელმწიფოდ წარმოჩენა, რაც სავსებით არ შეესაბამება სიმართლეს, მაშინ, როდესაც ფაქტობრივად ყველა საჯარო და მათ შორის ძალოვანი, სამწუხაროდ, არის ჩამოშლილი", — აცხადებს გეგელია.

დღეს, 6 ოქტომბერს პრემიერმინისტრმა, ირაკლი ღარიბაშვილმა მიხეილ სააკაშვილზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორსა და თეორიას იმაზე, თუ რატომ ჩამოვიდა ექსპრეზიდენტი ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ საკუთარი მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ამ თემაზე ირონიულად საუბარი აძლიერებს სტიგმას და დისკრიმინაციულია.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს.