მესამე ძალა–სტრატეგია აღმაშენებლის ლიდერის, გიორგი ვაშაძის განცხადებით, მისი პარტია კოალიციებში მონაწილეობის მიღებას არ აპირებს და სხვა პარტიებთან კონსულტაციები არ ჰქონიათ. მისი თქმით, ამ ეტაპზე, არჩევნებში მიღებული შედეგების გაანალიზებით არიან დაკავებული.

"არავისთან კონსულტაცია არ გვქონია, ვაფასებთ ჩვენს საარჩევნო შედეგებს და ვმუშაობთ იმისთვის, რომ დავიცვათ ჩვენი მხარდამჭერები პოლიტიკური წნეხისგან. რაც შეეხება კოალიციებს, ჩვენ ამ ეტაპზე, არანაირ კოალიცეიბში მონაწილეობას არ ვაპირებთ, იმიტომ, რომ ჯერ კარგად უნდა გავაანალიზოთ ის შედეგები, რაც ამ არჩევნების შემდეგ დადგა", — აცხადებს ვაშაძე.

აღსანიშნავია, რომ თვითმმართველობის არჩევნებში პარტია მესამე ძალა — სტრატეგია აღმაშენებელმა პროპორციული ხმების 1,34% მიიღო. რაც შეეხება პარტიის მერობის კანდიდატს, თამარ კეკენაძეს, მან ხმების 0,61% მოიპოვა და კანდიდატებს შორის მე–7 ადგილზე გავიდა, ის 6 ხმით უსწრებს მერობის დამოუკიდებელ კანდიდატს, არინზე რიჩარდ ოგბუნუჯუს.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო