ქართული ოცნების თავმჯდომარე, ირაკლი კობახიძე სენატორი ჯიმ რიშის განცხადებას ეხმაურება და ამბობს, რომ მან არ იცის, რა ხდებოდა საქართველოში, რადგან ის ქართველი არ არის.

"როდესაც ადამიანი ერთმანეთს ადარებს 2012 წლის და 2021 წლის არჩევნებს, იმას რა უნდა მოჰკითხო, მე არ ვიცი, ეს არის წარმოუდგენელი რამ. [...] იმ კაცმა არ იცის და თქვენ ხომ იცით, რაც ხდებოდა 2012 წელს საქართველოში, თუ არ გახსოვთ, შეიძლება ბავშვი იყავით მაშინ. რა თქმა უნდა, ის ქართველი არ არის და არ იცის, აქ რა ხდებოდა, მაგრამ 2012 წელს რაც ხდებოდა, ის იყო წარმოუდგენელი რამ და როცა ადარებ 2012 წელს 2021 წელს, ნიშნავს, რომ ან არ გახსოვს, რა ხდებოდა 2012 წელს, ან სხვა რამეშია საქმე", — უთხრა კობახიძემ ჟურნალისტებს.

სენატორმა ჯიმ რიშმა გუშინ, 4 ოქტომბერს გამოაქვეყნა განცხადება, სადაც ამბობს, რომ საქართველოში ჩატარებული არჩევნები დაუჯერებლად იმედგამაცრუებელი იყო. მისი თქმით, ეს იყო დრამატული უკუსვლა 2012 წლის არჩევნებისგან, რომელსაც ის აკვირდებოდა.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება, მათ შორის, თბილისშიც. რაც შეეხება პარტიულ შედეგებს, დათვლილია უბნების 100% დათვლილია — ქართულ ოცნებას ხმების 46,74% აქვს, ნაციონალურ მოძრაობას კი 30,68%.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.