ვისაც ბიბლიოთეკიდან გამოტანილი წიგნის უკან დაბრუნება ერთხელ მაინც დაჰგვიანებია, ეს ამბავი განსაკუთრებით დააინტერესებს. მეტიც — შესაძლო სინდისის ქენჯნასაც გაიყუჩებს.

კანადის ქალაქ ტორონტოს ერთ-ერთ საჯარო ბიბლიოთეკაში ამ ცოტა ხნის წინ დააბრუნეს დენის ლის საბავშვო პოემების კრებული Nicholas Knock and Other People (ნიკოლას ნაქი და სხვები), რომელიც — ახლა რასაც წაიკითხავთ, სულაც არ გეჩვენებათ — 1978 წელს გაიტანეს ბიბლიოთეკიდან.

გამოცდილი ბიბლიოთეკარებიც კი, რომლებიც ყოველდღიურ პრაქტიკაში მიჩვეულები არიან დათქმულ ვადაზე გადაცილების შემთხვევებს, გაოცდნენ ამ შემთხვევით და ფეისბუქზეც გამოაქვეყნეს ინფორმაცია ამის შესახებ.

"სჯობს გვიან, ვიდრე არასდროს", — ვკითხულობთ აღწერაში.

შეიძლება ამ წიგნის მკითხველის გაკიცხვა მოინდომოთ, თუმცა თავად ბიბლიოთეკის თანამშრომლები უფრო მეტად გახარებულები არიან ამ ფაქტით, ვიდრე პირიქით:

"სამწუხაროდ, არ ვიცით სად და რატომ იყო წიგნი ამდენი ხნით მკითხველთან. მართალია, ამდენხნიანი დაგვიანება ჩვეულებრივი ამბავი არ არის, მაგრამ ჩვენ ყოველთვის მივესალმებით წიგნების ბიბლიოთეკაში დაბრუნებას", — განუცხადეს ადგილობრივ გამოცემას.

თუ ბიბლიოთეკაში წიგნი გაქვთ დასაბრუნებელი, მაგრამ სხვადასხვა მიზეზით აჭიანურებთ, ყოველთვის შეგიძლიათ ეს ამბავი გაიხსენოთ და თუნდაც დაგვიანებით მაინც დააბრუნოთ.