ქართული ოცნების დეპუტატის, მამუკა მდინარაძის განცხადებით, მარნეულში "პროვოკაციების მოწყობის მცდელობების" ეპიცენტრი იყო. მისი ინფორმაციით, აღნიშნულთან დაკავშირებით ორი ადამიანი დააკავეს.

"ეს ორი ადამიანი როგორც გვეუბნებიან, დაკავებულები არიან. ადმინისტრაციული გადაცდომა ჰქონდათ მათ და ერთ-ერთი ინციდენტის დროს დააკავეს. ამ ინციდენტების ეპიცენტრი იყო 22-ე საარჩევნო ოლქის 48-ე საარჩევნო უბანი. ამ უბანზე TV პირველმა გაუშვა კადრები, რომელშიც ჩანს სავარაუდო ჩაყრის ფაქტი, იქ გულწრფელად რომ ვთქვათ, კარგად არ ჩანს რა მომენტში ყრის, მაგრამ გვერდიდან ჩანს ქალბატონი, რომელიც სავარაუდოდ ამას აკეთებს, შემდეგ ხელს აფარებს. დეტალებს დაადგენს გამოძიება", — აცხადებს ის.

მისი თქმით, ქალი, რომელიც კადრებში ჩანს, ნაციონალური მოძრაობის მხარდამჭერი და კომისიის წევრია. რაც შეეხება ორი ადამიანის დაკავებას, აღნიშნულთან დაკავშირებით, On.ge შინაგან საქმეთა სამინისტეოს დაუკავშირდა. მათ პასუხს მიღებისთანავე შემოგთავაზებთ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.