საქართველოში აშშ-ის ელჩის განცხადებით, ექსპრეზიდენტ მიხეილ სააკაშვილის შემთხვევა იქნება ტესტი სასამართლო და მართლმსაჯულების სისტემისთვის. კელი დედგანის თქმით, ამერიკა ამ პროცესს ყურადღებით აკვირდება. ამის შესახებ მან მარნეულში, საარჩევნო უბანზე სტუმრობისას ისაუბრა.

"ეს შემთხვევა იქნება ტესტი სასამართლო და მართლმსაჯულების სისტემისთვის, თუ რამდენად მიუკერძოებლად, სამართლიანად და ღიად წარიმართება პროცესი. ჩვენ, რა თქმა უნდა, ყურადღებით დავაკვირდებით ამ პროცესს და ვიმედოვნებთ ის იქნება ქართული სამართლისა და საერთაშორისო ვალდებულებების შესაბამისი", — განაცხადა დეგნანმა.

მისი თქმით, პოლიტიკური ლიდერები არჩევნების შემდგომ უნდა დაუბრუნდნენ მოსახლეობისთვის მნიშვნელოვანი საკითხების მოგვარებას.

"გუშინდელ დღეზე მნიშნველოვანია მომავალი და გზა წინისკენ. არჩევნები ესაა პერიოდი, როცა ყველასათვის მნიშვნელოვანია ისეთ საკითხებზე ყურადღების გამახვილება, რაც მოსახლეობას აწუხებს. იმედი გვაქვს პოლიტიკური ლიდერები დაუბრუნდებიან იმ საქმეს, რომელიც მოსახლეობას აწუხებს — ესენია კოვიდი, ეკონომიკა, სამსახურები, მაღალი ფასები, განათლება, წყალი, გზები და სხვა", — თქვა დეგნანმა.

საქართველოში, კელი დეგნანი არჩევნებზე დასაკვირვებლად მარნეულში ორ საარჩევნო უბანს ეწვია. მისი თქმით, საქართველოს სჭირდება მეტი პოლიტიკური სტაბილურობა და არა პოლარიზაცია.