ყოფილმა პრემიერმინისტრმა და თბილისის მერობის კანდიდატმა, გიორგი გახარიამ საკუთარი ხმა უკვე დააფიქსირა. კენჭისყრის შემდეგ მან განაცხადა, რომ ეს არჩევნები ქვეყნის განახლების წინაპირობა უნდა გახდეს და არ აქვს მნიშვნელობა ეს პირველივე ტურში იქნება და მეორეში.

"ეს უაღრესად პრინციპული არჩევნებია. ეს არის არჩევნები წარსულსა და მომავალს შორის. გულწრფელად მჯერა, რომ დღეს თითოეული საქართველოს მოქალაქე გრძნობს, რამდენად სჭირდება ქვეყანას განახლება და ის გააკეთებს ისეთ არჩევანს — გონიერს, გულით არჩევანს, რომელიც ქვეყანას წაიყვანს წინ. მეორე ტურში იქნება ეს, პირველ ტურში, ამას არ აქვს მნიშვნელობა. მთავარია წინსვლა", — განაცხადა გიორგი გახარიამ.

კითხვაზე, იქნება თუ არა მეორე ტურში, გახარიამ ასე უპასუხა:

"მე ყველგან ვიქნები".

გიორგი გახარიამ მოქალაქეებს მოუწოდა, არჩევნებში მონაწილეობა მიიღონ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.

გაიგე მეტი: