ქართული ოცნების თავმჯდობარის, ირაკლი კობახიძის განცხადებით, მიხეილ სააკაშვილის დაკავება არის იმ საქმის დაგვირგვინება, რაც ბიძინა ივანიშვილმა დაიწყო. აღსანიშნია, რომ რამდენიმე საათის წინ კობახიძე იმასაც კი არ აღიარებდა, რომ სააკაშვილი საქართველოში იყო ჩამოსული.

"სიმბოლურია, რომ ეს მოხდა ზუსტად 9 წლის თავზე, იმ მომენტიდან, როდესაც ბიძინა ივანიშვილმა ქართულ საზოგადოებას საქართველოში თავისუფლების და დემოკრატიის გამარჯვება მიულოცა. ეს არის იმ საქმის დაგვირგვინება, რომელიც ბიძინა ივანიშვილმა ზუსტად 10 წლის წინ დაიწყო", — თქვა კობახიძემ.

მან ასევე მიულოცა პრემიერმინისტრ ირაკლი ღარიბაშვილს ოპერაციის წარმატებით ჩატარება და სამართალდამცავ სტრუქტურებს მადლობა გადაუხადა.

კობახიძემ აღნიშნა, რომ დღეს წინასაარჩევნო კამპანია სრულდება და მიუხედავად "რამდენიმე მძიმე პროვოკაციისა, რომელიც ნაციონალურმა მოძრაობამ არჩევნებამდე ბოლო 10 დღის განმავლობაში მოასწრო, მათ ვერ შეძლეს საარჩევნო გარემოს ხელოვნურად გაუარესება".

ექსპრეზიდენტის დაკავებაზე ინფორმაცია პრემიერმინისტრმა გაავრცელა. ბრიფინგზე მას თან ახლდნენ შინაგან საქმეთა მინისტრი და სახელმწიფო უსაფრთხოების სამსახურის უფროსი, თუმცა მათ არც განცხადება გაუკეთებიათ და არც კითხვებზე უპასუხიათ.

პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა რომელმაც შექმნა ვარაუდი, რომ შესაძლოა, ის საქართველოში იყო. ამასთან, მან გაავრცელა ორი ვიდეოც, სადაც ამბობდა, რომ ბათუმშია.

შინაგან საქმეთა სამინისტროში ამბობდნენ, რომ ექსპრეზიდენტს ქვეყნის საზღვარი არ გადმოუკვეთავს. ქართული ოცნების თავმჯდომარე ირაკლი კობახიძე კი ამტკიცებდა, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობდნენ, რომ ის ნამდვილად ჩამოვიდა,

აღსანიშნია ისიც, რომ 27 სექტემბერს სააკაშვილმა სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.