თბილისში ოკუპირებულ აფხაზეთში უკანონო პატიმრობაში მყოფი ირაკლი ბებუას მხარდასაჭერი აქცია გაიმართა. ოჯახის წევრები და სამოქალაქო აქტივისტები მთავრობის ადმინისტრაციასთან შეიკრიბნენ და პრემიერმინისტრთან, ირაკლი ღარიბაშილთან შეხვედრა მოითხოვეს.

"გვინდა ღარიბაშვილთან შეხვედრა, იმიტომ, რომ ჩემს შვილს ჯანმრთელობის პრობლემები აქვს, ისიც არ ვიცით, რა პრობლემები. ერთადერთი ეს მოთხოვნა არის, რომ ჩემი შვილის ჯანმრთელობის მდგომარეობა გვაინტერესებეს, მშობელი ვარ. ამიტომ გვინდა, ღარიბაშილთან შეხვედრა. ვიყავი წინაზეც და არანაირი რეაგირება არ არის", — განუცხადა ბებუას დედამ, დალი ფიფიამ On.ge-ს.

ფოტო: გვანცა სეთურიძე / On.ge

30 სექტემბერს საქართველოს მოქალაქე ირაკლი ბებუა გალის რაიონში აფხაზური ე.წ. რესპუბლიკის დროშის დაწვისთვის დააკავეს. ამ ფორმით მან გააპროტესტა "დამოუკიდებლობის" ზეიმი, რომელსაც ოკუპირებულ რეგიონში 30 სექტემბერს აღნიშნავენ.

დროშის დაწვისთვის ირაკლი ბებუას 9 წლით თავისუფლების აღკვეთა 7 დეკემბერს მიუსაჯესა.

გალის რაიონი ერთადერთი მხარეა აფხაზეთში, სადაც მოსახლეობის აბსოლუტურ უმრავლესობას ეთნიკურად ქართველები შეადგენენ. მიუხედავად იმისა, რომ 1992-93 წლებში აფხაზეთში ომის დასრულების შემდეგ, მათ გალის რაიონში, თავიანთ სახლ-კარში დაბრუნების უფლება მისცეს, ადგილობრივი ქართველების უფლებრივი მდგომარეობა ძალიან მძიმეა. იქ არსებული ეთნიკური ნიშნით დისკრიმინაციის გამო, აფხაზურ მხარეს ადამიანის უფლებათა დამცველი სხვადასხვა საერთაშორისო ორგანიზაცია აკრიტიკებს.