თალიბანმა ქალებისთვის კიდევ ერთი აკრძალვა დააწესა. ამიერიდან ქაბულის უნივერსიტეტში ქალები ვერც ისწავლიან და ვეღარც იმუშავებენ. აღნიშნული შეზღუდვა განუსაზღვრელი დროით იმოქმედებს — მანამ, სანამ "შესაბამისი ისლამური გარემო არ შეიქმნება".

"მანამ, სანამ ნამდვილი ისლამური გარემო ყველასთვის არ შეიქმნება, ქალებს უნივერსიტეტში სწავლისა და მუშაობის უფლება აღარ ექნებათ. ისლამი უპირველეს ყოვლისა", — განაცხადა ქაბულის უნივერსიტეტის რექტორმა ტვიტერზე.

თალიბანმა ქალებისთვის განათლების მიღების ახალი წესები რამდენიმე კვირის წინ დააანონსა. ამის შესახებ ინფორმაცია BBC-მ გაავრცელა. როგორც BBC წერდა, არსებობდა ვარაუდი, რომ ახალი წესები ქალებს სწავლების გაგრძელების საშუალებას აღარ მისცემდა, რადგან უნივერსიტეტებს არ აქვთ შესაბამისი რესურსი განცალკევებული კლასების უზრუნველსაყოფად. თუმცა მედიის ცნობით, განათლების მინისტრი აბდულ ბაკი ჰაკანი ამას უარყოფდა და აცხადებდა, საკმარისი ქალი მასწავლებლები არიან და საჭიროების შემთხვევაში დაემატებიან.

ქაბულის უნივერსიტეტის ლექტორმა ცოტა ხნის წინ განაცხადა, რომ ქალი ლექტორების რაოდენობა მცირეა, ამიტომ ისინი მუშაობენ გეგმაზე, რომლის მიხედვითაც კაცი ლექტორები ქალ სტუდენტებს ლექციებს ფარდის მიღმა მდგომნი ჩაუტარებენ.

"ქალი ლექტორების სიმცირის გამო, ვმუშაობთ ახალ გეგმაზე, რომლის მიხედვითაც კაცი ლექტორები ქალ სტუდენტებს ლექციებს საკლასო ოთახში ფარდის მიღმა მდგომნი ჩაუტარებენ. ამ გზით ქალი სტუდენტებისთვის განათლების მისაღებად შესაბამისი ისლამური გარემო შეიქმნება", — ამბობს უნივერსიტეტის რექტორი.

ცოტა ხნის წინ ავღანეთის დედაქალაქ ქაბულის მერმა, ჰამდულა ჰომეინმა მუნიციპალიტეტში დასაქმებულ ქალებს სახლში დარჩენისკენ მოუწოდა მანამ, სანამ მათ სამუშაო ადგილს კაცები არ შეავსებენ. მისი თქმით, თალიბანმა საჭიროდ მიიჩნია, რომ ქალებმა გარკვეული ხნით მუშაობა შეწყვიტონ.

ქაბულის მერის განცხადებით, ქალაქში დასაქმებულთა მესამედი ქალები არიან. მისივე თქმით, ზოგიერთი მათგანი მუშაობის გაგრძელებას შეძლებს, მაგალითად, სამუშაოს შეინარჩუნებენ ისინი, ვინც ქალთა საპირფარეშოებში მუშაობდნენ, სადაც კაცებს შესვლა არ შეუძლიათ, პოზიციებზე კი, რომლის დაკავებაც კაცებს შეძლებენ, ქალები მუშაობას ვეღარ მოახერხებენ.

თალიბანი, რომელიც ავღანეთს 1996-2001 წლებში მართავდა, განსაკუთრებით სასტიკი იყო ქალების მიმართ. მათ აკრძალული ჰქონდათ განათლების მიღება, მუშაობა, გარეთ კაცის გარეშე გასვლა ან საჯაროდ ისეთი ტანსაცმლით სიარული, რომელშიც სხეულის რომელიმე ნაწილი ან სახე დაფარული არ ექნებოდათ. არასრულწლოვანი გოგოების დიდ ნაწილს მათზე ბევრად უფროს კაცებზე აქორწინებდნენ და ნებისმიერი წესის დარღვევის შემთხვევაში, სასტიკად, წამებით ან სიკვდილით სჯიდნენ. არსებული წესები 2001 წელს შეიცვალა, როდესაც აშშ-მ თალიბანის ძალაუფლება დაამხო. დღეს ყველაფერი ისევ შეიცვალა.

ავღანეთზე კონტროლის ხელში აღების შემდეგ, თალიბანის პრესსპიკერმა მედიასთან პირველ პრესკონფერენციაზე ქალთა უფლებებზე ისაუბრა. მან ამ საკითხს "ძალიან მნიშვნელოვანი" უწოდა და თქვა, რომ მხარს უჭერენ ქალთა უფლებებს, თუმცა მხოლოდ შარიათის კანონის ფარგლებში. მას შემდეგ კი, რაც თალიბებმა ავღანეთი დაიკავეს, არაერთმა ავღანელმა ქალმა საჯაროდ ისაუბრა საკუთარი შიშებისა და მოლოდინების შესახებ.

ამავე თემაზე:

• ქაბულში ქალები მუშაობას მხოლოდ საპირფარეშოებში შეძლებენ — BBC;
• თალიბანმა ქალების საქმეთა სამინისტრო დახურა;
• თალიბანი ქალი სტუდენტებისთვის სწავლის ახალ წესებს აანონსებს;
• თალიბანმა ჰელმანდის პროვინციაში სტილისტებს კლიენტების წვერის გაპარსვა აუკრძალა.