ავღანეთში თალიბანის მიერ დაწესებული აკრძალვების რიცხვი თანდათანობით იზრდება. ცოტა ხნის წინ ჰელმანდის პროვინციაში სტილისტებს კაცების წვერის გაპარსვა და შეჭრა აეკრძალათ, სალონში და საზოგადოებრივ აბანოში კი მუსიკის ჩართვა ნებადართული აღარაა.

"ის, ვინც რომელიმე სალონში ან საზოგადოებრივ აბანოში სხვას წვერს გაპარსავს ან მუსიკას ჩართავს, შარიათის კანონის მიხედვით დაისჯება და მათ პრეტენზიის გამოთქმის უფლება არ ექნებათ", — წერია ოფიციალურ განცხადებაში.

ქალბულში მცხოვრები სტილისტების ნაწილი ადასტურებს, რომ აღნიშნული ბრძანება თალიბანისგან უკვე მიიღეს.

"მებრძოლები მოდიან და წვერის შეჭრას გვიკრძალავენ. ერთმა ისიც მითხრა, რომ მათ ჩვენს შესამოწმებლად გადაცმული ზედამხედველების შემოგზავნაც შეუძლიათ", — ამბობს ერთ-ერთი სტილისტი.

სხვა სტილისტის თქმით, მთავრობის წარმომადგენელმა დაურეკა და უბრძანა, რომ "ამერიკულ სტილს არ მიბაძოს".

ეს თალიბანის მიერ დაწესებულ აკრძალვათაგან მხოლოდ ერთ-ერთია. BBC-ის ცნობით, ავღანეთის დედაქალაქ ქაბულის მერმა, ჰამდულა ჰომეინმა მუნიციპალიტეტში დასაქმებულ ქალებს სახლში დარჩენისკენ მოუწოდა მანამ, სანამ მათ სამუშაო ადგილს კაცები არ შეავსებენ. მისი თქმით, თალიბანმა საჭიროდ მიიჩნია, რომ ქალებმა გარკვეული ხნით მუშაობა შეწყვიტონ.

ქაბულის მერის განცხადებით, ქალაქში დასაქმებულთა მესამედი ქალები არიან. მისივე თქმით, ზოგიერთი მათგანი მუშაობის გაგრძელებას შეძლებს, მაგალითად, სამუშაოს შეინარჩუნებენ ისინი, ვინც ქალთა საპირფარეშოებში მუშაობდნენ, სადაც კაცებს შესვლა არ შეუძლიათ, პოზიციებზე კი, რომლის დაკავებაც კაცებს შეძლებენ, ქალები მუშაობას ვეღარ მოახერხებენ.თალიბანმა ავღანეთზე კონტროლის დამყარებისა და ახალი მთავრობის ჩამოყალიბების შემდეგ, არაერთი სიახლე დააანონსა, თუმცა ის ძირითადად ძველ მიდგომებს იმეორებს.

12 სექტემბერს ცნობილი გახდა, რომ თალიბანი ქალი სტუდენტებისთვის სწავლის ახალი წესების შემოღებას აპირებს. კერძოდ, აიკრძალება ქალებისა და კაცების ერთად სწავლება და გადაიხედება სასწავლო პროგრამაც. განათლებაზე წვდომის შეზღუდვის გარდა, მათ ქალებს აუკრძალეს სამსახურებში მისვლაც. 18 სექტემბერს კი, თალიბანმა ქალების საქმეთა სამინისტრო დახურა და ღირსებისა და მანკიერების სამინისტროთი ჩაანაცვლა, რომელიც წარსულში მკაცრი რელიგიური დოქტრინების გატარებას ემსახურებოდა.

ამავე თემაზე: