პრემიერმინისტრი ირაკლი ღარიბაშვილი ბიძინა ივანიშვილის შესახებ ექსპრემიერ გიორგი გახარიას განცხადებას სამარცხვინოს უწოდებს. საუბარია გახარიას განცხადებაზე, სადაც მან თქვა, რომ ივანიშვილმა მისი და ხალხის ნდობა არ გაამართლა. ირაკლი ღარიბაშვილის თქმით, ყოფილი პრემიერისგან მსგავსი სიტყვების მოსმენა სამწუხაროა.

"ნამდვილად არ მსურს ახლა, ამ ფორმატში გავაკეთო შეფასება აღნიშნული განცხადების, უბრალოდ სამარცხვინო და სამწუხაროა ასეთი განცხადების გაკეთება ყოფილი პრემიერის მხრიდან", — აღნიშნავს ღარიბაშვილი.

25 სექტემბერს, გახარიამ ტელეკომპანია ფორმულას ეთერში თქვა, რომ ქართული ოცნების დამფუძნებელმა, ბიძინა ივანიშვილმა მისი ნდობა არ გაამართლა. ამის შესახებ მან მაშინ განაცხადა, როცა ჟურნალისტმა შეახსენა, რომ ადრე საუბრობდა ივანიშვილის "უმნიშვნელოვანეს როლზე" ქართული ოცნების მიმართ ნდობის საკითხში და ჰკითხა, ახლაც იმავე აზრზე იყო თუ არა. გახარიამ ამ კითხვას უარყოფითი პასუხი გასცა და თქვა: "ივანიშვილმა ნდობა არ გაამართლა. მარტო ჩემი არა, მოქალაქეების".

ირაკლი კობახიძემ ამ განცხადებასთან დაკავშირებით აღნიშნა, რომ გახარიას მიერ "კეზერაშვილის ტელევიზიაში" ივანიშვილის კრიტიკა ფსკერზე დაშვება იყო. მისი თქმით, გახარია ისეთ ქმედებებზე გადავიდა, რაც "თვითდაზიანებას ნიშნავს".