მესამე ძალის ერთ-ერთი ლიდერის, გიორგი ვაშაძის თქმით, დაპირისპირება მათი ხელწერა არ არის და მათ შეუძლიათ, ქართველი პოლიტიკოსები შეარიგონ. ამის შესახებ ვაშაძემ Palitra News-ის ეთერში ისაუბრა.

"მე ერთი რამ ვიცი, რომ მესამე ძალა და სტრატეგია აღმაშენებელი არ მონაწილეობს ამ დაპირისპირებაში და ჩვენი განსხვავებული ხელწერა ზუსტად აქ არის, ჩვენ შეგვიძლია, შევარიგოთ ეს ხალხი. ამისთვის გვინდა მხარდაჭერა — ჩვენ შეგვიძლია საქმეზე საუბარი დავაბრუნოთ პოლიტიკაში"

ჟურნალისტის კითხვას, ვისი შერიგება შეუძლია, ვაშაძე პასუხობს:

"ყველა აბსოლუტურად".

რეპლიკას ქართული ოცნებისა და ნაციონალური მოძრაობის ან ქართული ოცნებისა და გახარიას შერიგებაზე კი ვაშაძემ ასე უპასუხა:

"არავის დაძმაკაცებას არ ვაპირებ, მაგრამ გარანტიას ვაძლევ ყველას, რომ ჩვენი მხარდაჭერის შემთხვევაში და ჩვენი გამარჯვების შემთხვევაში, ჩვენ შეგვიძლია, დავასრულოთ ეს დაპირისპირების, თავპირისმტვრევის ფაზა ქართულ პოლიტიკაში და გადავიდეთ საქმის კეთებაზე. როცა ბევრი საქმე იქნება საკეთებელი, დამერწმუნეთ, ასეთ ქმედებებს ადგილი არ ექნება", — განაცხადა მან.

23 სექტემბერს, ევროკავშირის ოფისთან ნაციონალური მოძრაობის ლიდერი, ნიკა მელია და ქართული ოცნების თავმჯდომარე, ირაკლი კობახიძე ერთმანეთს ფიზიკურად დაუპირისპირდნენ და აგინეს. ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

მოგვიანებით ბრიფინგზე კობახიძემ საზოგადოებას ბოდიში მოუხადა იმ სიტყვების გამო, რომელიც მისგან მოისმინა.

გუშინ, 24 სექტემბერს ევოკავშირის ელჩმა საქართველოში, კარლ ჰარცელმა ევროკავშირის წარმომადგენლობის ოფისის წინ ნიკა მელიასა და ირაკლი კობახიძეს შორის მომხდარი დაპირისპირების შესახებ განცხადება გაავრცელა, სადაც თქვა, რომ წუხს ამ ფაქტის გამო. მან ასევე აღნიშნა, რომ კობახიძის მხრიდან ბოდიშის მოხდა მისასალმებელია.