დაავადებათა კონტროლის ეროვნული ცენტრის დირექტორის მოადგილე, პაატა იმნაძე ვაქცინაციის კამპანიური ბანერების ე.წ სისხლიანი ბანერებით ჩანაცვლების შესახებ დასმული კითხვის საპასუხოდ ამბობს, რომ ბანერებზე საუბრის ნაცვლად, მოსახლეობას ვაქცინაცია აინტერესებს და არა ბანერები. ჟურნალისტმა მას ჰკითხა, ხომ არ გეგმავს მთავრობა ამ მიდგომის შეცვლას და NCDC-ის მოთხოვნის დაკმაყოფილებას, რომ ბანერებზე კვლავ გამოჩნდეს ვაქცინაციის მხარდამჭერი სლოგანები.

"თქვენი და ჩემი ლაპარაკი მე მგონია, რომ ზუსტად იგივეა, რაც ბანერების ჩანაცვლება იყო, იმიტომ, რომ იმის მაგივრად, რომ ველაპარაკო მოსახლეობას, რამდენად მნიშვნელოვანია ვაქცინაცია, ვლაპარაკობ იმაზე, რაც უკვე დავგმეთ კაი ხანია, რომ ბანერები ჩანაცვლდა, ახლა ვლაპარაკობთ ბანერებზე, იმის მაგივრად, რომ საქმეზე ვილაპარაკოთ", — თქვა იმნაძემ ფორმულას ეთერში.

იმნაძემ ჟურნალისტს უთხრა, რომ ბანერებზე საუბრით "დრო იკარგება" და აღნიშნულზე კითხვას არ უპასუხა.

"ბანერები დავგმეთ, ხომ, მორჩა. ახლა ვილაპარაკოთ ვაქცინაციაზე" — განაცხადა მან.

დაავადებათა კონტროლისა და საზოგადოებრივი ჯანმრთელობის ეროვნული ცენტრმა (NCDC) 18 სექტემბერს განცხადება გაავრცელა, სადაც ვაქცინაციის მოწოდების ბანერების სხვა შინაარსის ბანერებით ჩანაცვლება ფაქტი დაგმო.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს.

დედაქალაქის შემდეგ ბანერი წარწერით "არა ნაცებს, არა ბოროტებას" საქართველოს სხვა ქალაქებშიც გააკრეს.