ქართული ოცნების თავმჯდომარის, ირაკლი კობახიძის განცხადებით, ნამახვანჰესის ხელშეკრულების გაწყვეტა არის ცუდი სიგნალი შემდგომი ინვესტიციებისთვის.

"ეს ყველა შემთხვევაში, რა თქმა უნდა, იყო კომპანიის მიერ გადადგმული ნაბიჯი, მთლიანობაში თქვენ იცით, რომ ენერგეტიკული დამოუკიდებლობის უზრუნველყოფა არის ერთ-ერთი მთავარი პრიორიტეტი, არამარტო ეკონომიკური თვალსაზრისით, არამედ პოლიტიკური და უსაფრთხოების თვალსაზრისითაც. აქედან გამომდინარე, ეს არის ცუდი სიგნალი, რა თქმა უნდა, შემდგომი ინვესტიციებისთვის, თუმცა საქართველოს ხელისუფლება გააკეთებს ყველაფერს იმისათვის, რომ კონკრეტულად ენერგეტიკის მიმართულებით ინვესტიციები გაგრძელდეს და ჩაიდოს დიდი ინვესტიციები", — განაცხადა კობახიძემ.

მისივე თქმით, ეს სამწუხარო ფაქტია, თუმცა ყველაფერი გაკეთდება იმისათვის, რომ ქვეყნის ენერგოდამოუკიდებლობა სათანადოდ იყოს უზრუნველყოფილი.

"მთავრობას აქვს 10-წლიანი სამოქმედო გეგმა, მათ შორის ენერგეტიკის კუთხით და მილიარდობით დოლარის ინვესტიციების მოზიდვა არის ამ სფეროში დაგეგმილი. ამ კუთხით, რა თქმა უნდა, არის სამწუხარო გადაწყვეტილება, სამწუხარო ფაქტი, მაგრამ ყველაფერი გაკეთდება იმისათვის, რომ ქვეყნის ენერგოდამოუკიდებლობას სათანადოდ იყოს უზრუნველყოფილი", — ამბობს ის.

ENKA საქართველოს მთავრობასთან ხელშეკრულებას წყვეტს და ნამახვანჰესს აღარ ააშენებს. აღნიშნული სტამბულის საფონდო ბირჟაზე გავრცელებულ განცხადებაშია ნათქვამი.