დმანისში ოპოზიციის ამომრჩეველთან შეხვედრის დროს დაპირისპირება მოხდა. გავრცელებულ კადრებში ჩანს, რომ რამდენიმე პირი ერთმანეთს ჯერ სიტყვიერად უპირისპირდება, შემდეგ კი ფიზიკურად.

პარტია პროგრესი და თავისუფლების ლიდერის, კახა ოქრიაშვილის განცხადებით, მათი 2 აქტივისტია დაჭრილი.

"ჩვენი მერობის კანდიდატი, მეც ვესწრებოდი ამ შეხვედრას, ხდებოდა სოფელ განთიადში მოსახლეობას. ამ თავყრილობას, შეხვედრას ძირითადად ქალები ესწრებოდნენ, როდესაც 20-30 აგრესიულად განწყობილი ადამიანი თავს დაესხა ჩვენს ხალხს. 2 ადამიანია დაჭრილი, რამდენიმეა დაშავებული, მათ შორის გოგოები", — განაცხადა მან

ამასთან, ის მომხდარში ქართული ოცნების მაჟორიტარობის კანდიდატის, მიხეილ დაუთაშვილის შვილს ადანაშაულებს. დაუთაშვილმა მთავარ არხთან მისი შვილის ადგილზე ყოფნას უარყო.

"კახა ოქრიაშვილის დაგეგმილი თემა იყო. გამოიარეს სიგნალებით, შეურაცხყოფებით [...] ჩემი შვილი მე დღესაც არ მინახავს სად არის და როგორ გაარკვიეთ, რომ ჩემი შვილი იყო, არ ვიცი. თუ ეგრე მიაჩნიათ თვითონ, რომ მაინცდამაინც ჩემი შვილი უნდა ყოფილიყო, არ ვიცი, მაგრამ იქნებ, მიამსგავსეს. ფაქტია, რომ არ ყოფილა [...] ხომ შეიძლება თვითონ დააზიანეს? ერთმანეთში მოხდა რაღაც შელაპარაკება და თვითონ მიაყენეს ერთმანეთს ფიზიკური და სიტყვიერი შეურაცხყოფა", — განაცხადა მან.

On.ge ქართულ ოცნების წარმომადგენლებთან დაკავშირებას ცდილობს, მათ პასუხს მიღებისთანავე შემოგთავაზებთ. აღნიშნულზე შინაგან საქმეთა სამინისტროსაც დავუკავშირდით, ამ ეტაპზე უწყების პასუხს ველოდებით.