20 მარტს, 15 საათზე ჭავჭავაძის გამზირზე, თსუ-ის პირველი კორპუსის მიმდებარე მიწისქვეშა გადასასვლელთან წიგნით მოვაჭრეების მხარდასაჭერი აქცია გაიმართება. აქციის ორგანიზატორი მოძრაობა აუდიტორია 115-ის წევრები "ყველა წიგნის მოყვარულს, მწერალს, მთარგმნელს, პროფესორსა და მოქალაქეს" იწვევენ შეკრებაზე.

"შეკრებილებს მიწისქვეშა გადასასვლელთან თავისუფალი მიკროფონი დახვდებათ. ნებისმიერს შეეძლება მიკროფონთან მისვლა და მის მიერ ბუკინისტებთან შეძენილი წიგნის შესახებ საუბარი. ქუჩაში ნაყიდ გამოცემათა შესახებ მოკლე მსჯელობებით სოლიდარობას გამოვუცხადებთ ადამიანებს, რომლებსაც ოჯახების გადასარჩენად წიგნებით ვაჭრობის გარდა სხვა გზა აღარ დარჩენიათ," - წერია ფეისბუკ ღონისძიების აღწერაში.

აქციის ორგანიზატორებს მიაჩნიათ, რომ ბუკინისტების საქმიანობა პირდაპირ არის დაკავშირებული საგანმანათლებლო პროცესთან. მათივე აზრით, ძველი წიგნების შემგროვებელთა დახმარებით უამრავი პროფესორი და სტუდენტი ახერხებს ხელმისაწვდომ ფასად კლასიკური ლიტერატურის სასურველი ნიმუშების მოძიებას:

"ჩვენი უნივერსიტეტის მისადგომებთან გაშლილ თაროებზე არაერთხელ აღმოგვიჩენია წლობით ნანატრი გამოცემების უნიკალური ეგზემპლარები. ბუკინისტებსა და უნივერსიტეტელებს შორის სრული ნდობა არსებობს. ალბათ, ამიტომაც ჩვენს პარტნიორებს ბევრი ჩვენგანისთვის დიდი დავიდარაბის გარეშე, დიდი ხნით ნისიადაც კი დაუთმიათ საინტერესო წიგნები."

გასულ კვირას, თბილისის მერიის ზედამხედველობის საქალაქო სამსახურის წარმომადგენლებმა თბილისის სახელმწიფო უნივერსიტეტის მიმდებარედ მოვაჭრე ბუკინისტები გააფრთხილეს და ადგილის დაცარიელებისკენ მოუწოდეს.