თელავში ურნები გამოჩნდა, რომლებშიც მოქალაქეებს დახარისხებული ნარჩენების განთავსება შეუძლიათ. პროექტი ეკუთვნის ორგანიზაციას, ნარჩენების მართვის ტექნოლოგიები რეგიონებში.

როგორც WMTR პროგრამის წარმომადგენელმა On.ge-ს უთხრა, მსგავსი ურნები კიდევ თელავი რაიონის 5 სოფელში დგას.

პროგრამის ფარგლებში შეგროვებული ნარჩენები ადგილზე ხარისხდება, საიდანაც ისინი კომპანიებს მიაქვთ.

"ურნებს ზოგი დანიშნულების მიხედვით იყენებს ზოგი არა, ნარჩენების ერთმანეთში არევა მაინც ხდება ხოლმე, ამ მიმართულებით მუშაობა ძალიან ხანგრძლივია" - გვითხრეს ორგანიზაციაში.

უმნიშვნელოვანესი დახარისხებული ნარჩენიდან ქაღალდი ადგილობრივ ბაზარზე იყიდება სხვადასხვა კომპანიებს შორის, პლასტმასი კი ექსპორტზე გადის, რადგან საქართველოში მას ჯერჯერობით ვერ ამუშავენ.

ურნებს თელავში უკვე გამოეხმაურნენ.

"წუხელ გავიტანე ნაგავი და ჰოი საოცრებავ! პლასტმასები ცალკე და საკვების ნარჩენები ცალკეო, ბრძანება იყო, მე კი, ერთმანეთში არეულ ჩემ ნაგავში მომიწია ხელის წაყოფა და გადანაწილება გადარჩევა, ნაგავში ქექვა ესე ვის გაუხარდა ბოლოს არ ვიცი, მაგრამ მე გუშინ გავბედნიერდი" - წერს ანა სოფია ბარათაშვილი ფეისბუკზე.

ნარჩენების გადანაწილების კუთხე თბილისის მოსახლეობისთვის გუდვილის დიდი დიღმის ფილიალის შესასვლელთანაა.

პროგრამა ნარჩენების მართვის ტექნოლოგიები რეგიონებში (WMTR) საქართველოში 2014 წლის 18 მარტს დაიწყო. მას ფინანსურ მხარდაჭერას უწევს აშშ-ის საერთაშორისო განვითარების სააგენტო (USAID) და ახორციელებს ქალაქებისა და საგრაფოების მართვის საერთაშორისო ასოციაციასთან (ICMA) და ადგილობრივ ქვეკონტრაქტორ ორგანიზაციასთან (CENN) თანამშრომლობით.