ყოფილი პრემიერმინისტრი, გიორგი გახარია ამტკიცებს, რომ არ ჰქონდა ინფორმაცია იმის შესახებ, რომ ქვეყანაში ასეთი მასშტაბური მოსმენები და მიყურადება მიმდინარეობდა. მისივე თქმით, არც პრემიერმინისტრობისას და არც შს მინისტრობისას არ იცოდა ამის შესახებ, მიუხედავად იმისა, რომ გავრცელებული ჩანაწერების ნაწილი, სწორედ მისი თანამდებობაზე ყოფნის თარიღებს ემთხვევა.

"უსაფრთხოების სამსახურიდან, რა თქმა უნდა, მე როგორც პრემიერმინსიტრს, მომდიოდა გარკვეული ბრიფები ქვეყნის შიდა და გარე უსაფრთხოებაზე, მაგრამ [ამ მასშტაბის] არა, რა თქმა უნდა", — განაცხადა მან ფორმულას ეთერში.

ამ პასუხის შემდეგ წამყვანმა მას ჰკითხა, მაშინ რისი და ვისი პრემეირმინისტრი, იყო, რაზეც გახარიამ უპასუხა:

"მაშინ, როდესაც მე როგორც პრემიერმინისტრი ეს რეალობა ვნახე, რომ პარტია უბრალოდ პირდაპირ იჭრებოდა მთავრობის უფლებამოსილებაში, მე მაშინ გადავდექი. ეს იყო ის პასუხისმგებლობა, რომელიც მე ავიღე. მიუხედავად ამისა, მანამდე ჩვენ გვქონდა მთელი რიგი გეგმა რეფორმირების. ჩვენ ერთი რამე უნდა გვახსოვდეს ხალხნო, ჩვენ გარდამავალი დემოკრატია ვართ, უნდა გვესმოდეს, რომ ჩვენ დღეს შეიძლება დემოკრატიული პარამეტრებით ნორმალურ ფორმაში ვიყოთ, მაგრამ 3-4 თვეში თუ სტრუქტურული რეფორმები არ გავაგრძელეთ, სულ ყველაფერი წყალში ჩაგვეყრება. ამიტომ ნუ გვაქვს იმის შეგრძნება, რომ საქართველოში მიღწევები დიდი ხნით შენარჩუნებადია, არ არის. ამის ძალიან კარგი მაგალითი იყო შინაგან საქმეთა სამინისტრო, სადაც 2 წლის განამვლობაში მართლა მნიშვნელოვანი რეფორმები დავიწყეთ და ერთ წელიწადში იმ რეფორმებიდან არაფერი აღარ დარჩა, დღეს იმ რეფორმებიდან აღარაფერი აღარ არის".

რაც შეეხება მმართველი გუნდის განცხადებებს იმის შესახებ, რომ ფაილების გავრცელებასთან, შესაძლოა, გახარიას გუნდის წევრებს ჰქონდეთ კავშირი და ამას გამოძიება დაადგენს, გახარია ამბობს, რომ გამოძიების დაწყებას თავად მოითხოვენ.

"ოღონდ ისეთი გამოძიების კი არა, ზოგიერთებს რომ ჰგონიათ, ჩვენ მოვითხოვთ ამ გამოძების დაწყებას და უფრო მეტსაც გეტყვით, როგორც კი ჩვენ ამ საარჩევნო პროცესს გადავაგორებთ, მე ვიქნები ადამიანი, რომელიც პრინციპულად, პერსონალურად იქნება ამ პროცესში ჩარეული", — განაცხადა მან.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე: