უკანონო მიყურადებასა და თვალთვალზე გავრცელებულ მასალებზე ლელოს ლიდერი, მამუკა ხაზარაძე პროკურატურას მოუწოდებს გამოძიება დაიწყოს და დაკითხონ ის, როგორც ჩანაწერებში მოხსენიებული ერთ-ერთი პირი, რომელიც მასსა და მეუფე თეოდორეს შორის სატელეფონო საუბრის ავთენტურობას ადასტურებს. მისივე თქმით, ფაქტები საფუძვლიან ეჭვს აჩენს, შესაბამისი სახელმწიფო სტრუქტურების წარმომადგენლები უკანონო თვალთვალს, პირადი საუბრების მოსმენასა და პირადი ცხოვრების კადრების გადაღებას მასობრივად აწარმოებენ.

"მოვითხოვ პროკურორებმა შეწყვიტონ ე.წ. ფულის გათეთრების შეთითხნილ საქმეზე ჩემი სასამართლოებში ტარება და დაუყოვნებლივ დამკითხონ დანაშაულის უტყუარ ფაქტზე — ჩემი და მეუფე თეოდორეს სატელეფონო საუბრის უკანონოდ მიყურადებასა და ჩაწერაზე.

მოვითხოვ, ბატონმა ღარიბაშვილმა შეწყვიტოს წინა ხელისუფლების დროს ჩადენილ ბოროტმოქმედებებზე საუბარი და საზოგადოებას უთხრას, 2012 წელს პირადად როგორ გადაიბარა უკანონო თვალთვალის მანკიერი სისტემა შსს მინისტრისა და შემდეგ პრემიერის რანგში. როგორ ხელმძღვანელობს ფარული თვალთვალისა და შანტაჟის სამარცხვინო სისტემას", — ამბობს ხაზარაძე.

ის, ასევე, აღნიშნავს, რომ ქართულმა ოცნებამ და ტოტალურად მოსმენებისა და თვალთვალის მახინჯი სისტემა წინა ხელისუფლებისაგან გადაიბარა და დანერგა.

"ამ სისტემის მეშვეობით ისინი აშინებენ, აშანტაჟებენ ადამიანებს და ამით სურთ ძალაუფლების განმტკიცება და ხელისუფლების შენარჩუნება. ხელისუფლება დიდი მონდომებით ირგებდა ამ წლებში მართლმადიდებელი ეკლესიის დამცველის იმიჯს, პოლიტიკურ კამპანიას აწარმოებდა და ყველა სხვას ანტიეკლესიურ ძალებად რაცხავდა. როგორც გავრცელებული ინფორმაციიდან ჩანს, სწორედ ეკლესიის წარმომადგენლებს — მაღალ იერარქებსა თუ ზოგადად სასულიერო პირებს უსმენს და უთვალთვალებს ქართული ოცნების ხელისუფლება", — აცხადებს ხაზარაძე.

მისივე თქმით, "ამ შემთხვევაში ისინი არამარტო ადამიანის პირადი ცხოვრების ხელყოფას ახდენენ, აშანტაჟებენ და მათ დისკრედიტაციას ახდენენ, არამედ უხეშად არღვევენ კონსტიტუციას, როცა ასე ბინძურად და უკანონოდ ერევიან ეკლესიის შიდა საქმეებში და ამ ყველაფერს საკუთარი პოლიტიკური მიზნებისათვის იყენებენ".

ის, ასევე, ყოფილი პრემიერმინისტრის გიორგი გახარიასგან მოითხოვს მისი მინისტრობის დროს რის საფუძველზე და რა მიზნით უსმენდა მას, მეუფე თეოდორესა და კიდევ ათასობით მოქალაქეს.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

• მედიის ოთხმა წარმომადგენელმა გავრცელებულ ჩანაწერებში საკუთარი საუბარი ამოიცნო
• რაც ვნახე მესენჯერიდან არის ძალიან ბევრი რამე — კვესიტაძე გავრცელებულ ჩანაწერებზე
• ხაზარაძე გავრცელებული ჩანაწერების ნამდვილობას ადასტურებს
• ტაბულას რედაქტორმა გავრცელებულ ფაილებში საკუთარი საუბარი ამოიცნო

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ამავე თემაზე:

• მაღალია ალბათობა, რომ მოსმენები და პირად ცხოვრებაზე ინფორმაციის შეგროვება ხდება — ლომჯარია
• ინსპექტორი აცხადებს, რომ სავარაუდო უკანონო მიყურადების ფაქტებზე საჭიროა დროული გამოძიება
• მეუფე ნიკოლოზი გავრცელებულ ჩანაწერებზე პასუხისმგებლობას სახელმწიფოს აკისრებს