ლევან სამხარაულის სახელობის ექსპერტიზის ეროვნული ბიურო ეხმაურება თბილისის მერობის კანდიდატის, გიორგი გახარიას განცხადებას ბიუროში დაგეგმილი შესაძლო პროვოკაციის შესახებ. სამხარაულში აცხადებენ, რომ ექსპრემიერის განცხადების მიზანი მათი დისკრედიტაციაა.

"გვსურს გამოვეხმაუროთ ქ. თბილისის მერობის კანდიდატის, ბატონი გიორგი გახარიას განცხადებას, თითქოს მას აქვს "უტყუარი ინფორმაცია სამხარაულის ექსპერტიზის ბიუროში დაგეგმილ პროვოკაციაზე". მსგავსი შინაარსის განცხადება ყოველგვარი მტკიცებულებისა და ფაქტობრივი მოცემულობის გარეშე არის უაღრესად დამაზიანებელი დამოუკიდებელი სახელმწიფო ინსტიტუციის მიმართ და მიზნად ისახავს ბიუროს და მისი თანამშრომლების დისკრედიტაციას", — ვკითხულობთ ბიუროს განცხადებაში.

უწყებაში აცხადებენ, რომ ნარკოტესტს საერთაშორისო სტანდარტების დაცვითა და კანონმდებლობის შესაბამისად ატარებენ.

"ბიუროში აღნიშნული ექსპერტიზის ჩატარებისას გამოსაკვლევი პირის თანდასწრებით, დაუყონებლივ, ადგილზევე ხდება ბიოლოგიური ნიმუშის გამოკვლევა და დასკვნის გაცემა. საკვლევ ნიმუშში ნარკოტიკული საშუალების მოხმარების ფაქტის დადგენის შემთხვევაში, გამოსაკვლევი პირის თანდასწრებით, სპეციალური ლუქების მეშვეობით და მასზე გამოსაკვლევი პირის ხელმოწერის დატანის შემდეგ, დალუქული ბიოლოგიური ნიმუშების შენახვა ხდება ორ ულუფად შესაბამის ტემპერატურაზე.

აღნიშნული პროცედურა ემსახურება გამოსაკვლევი პირისთვის შესაძლებლობის მინიჭებას, რომ სურვილის შემთხვევაში, მის მიერ მოხდეს ბიოლოგიური მასალის გადამოწმება სხვა ნებისმიერ საექსპერტო დაწესებულებაში, როგორც ქვეყნის შიგნით, ასევე მის ფარგლებს გარეთ. გადასამოწმებელი ნიმუშის გატანა გამოსაკვლევ პირს შეუძლია დაუყონებლივ, კვლევის დასრულებისთანავე", — განმარტავენ სამხარაულის ბიუროში.

თბილისის მერობის კანდიდატმა, გიორგი გახარიამ დღეს განაცხადა, რომ სამხარაულის ექსპერტიზის ბიუროდან მიაწოდეს ინფორმაცია შესაძლო პროვოკაციასთან დაკავშირებით. კონკრეტულად, მისი თქმით, პროვოკაცია მზადდებოდა ქართული ოცნების მხრიდან და ეს უკავშირდებოდა მის ტესტირებას ნარკოტიკზე.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

გაიგე მეტი: