მედიის ოთხმა წარმომადგენელმა გავრცელებულ ჩანაწერებში საკუთარი საუბარი ამოიცნო. TV პირველი საინფორმაციო სამსახურის ხელმძღვანელი, ნოდარ მელაძე, მთავარი არხის გენერალური დირექტორი, ნიკა გვარამია, ფორმულას ჟურნალისტი, ნინო ვარძელაშვილი და მთავარი არხის ჟურნალისტი, ეკა კვესიტაძე აცხადებენ, რომ ფაილებში საკუთარი საუბარი ამოიცნეს.

"ამ ფაილებში არის ჩემი სატელეფონო მოსმენის შიფრები, ჩემი და ბოდბელი ეპისკოპოსი იაკობის, ჩემი და მამა ანდრია სარიას, ჩემი და მეუფე ნიკოლოზის. მამა ანდრიას ვესაუბრე whatsup-ით ძალიან ბევრი ჟურნალისტის საუბრებია ამ ფაილებში, მათ შორის ჩემიც, დაურეკე კომენტარი გვინდა-თქო", — წერს ნოდარ მელაძე ფეისბუქგვერდზე.

ფორმულას ჟურნალისტის განცხადებით, საუბარი, რომელიც ჩანაწერშია აღნიშნული, სინოდის სხდომამდე რამდენიმე დღით ადრე შედგა მასსა და გიორგი ზვიადაძეს შორის.

"მე შემიძლია დავადასტურო ამ ნაწილის ავთენტურობა იმიტომ, რომ შედგა ჩემსა და გიორგი ზვიადაძეს შორის ეს სატელეფონო საუბარი. ეს ხდებოდა ამ წლის თებერვალში, სინოდის სხდომამდე, ალბათ, რამდენიმე დღით ადრე. ჩვენს ეთერში გასული არის სწორედ ამ შინაარსის სატელეფონო ჩანაწერი და ერთი ერთში აქვთ გაშიფრული ის დიალოგი, რომელიც შედგა ჩემსა და მამა გიორგი ზვიადაძეს შორის", — ამბობს ის ფორმულას ეთერში.

მთავარი არხის ჟურნალისტის თქმით, ჩანაწერებში არის, ასევე, მისი და მეუფე იაკობის სატელეფონო საუბარი.

"ორი წლის წინ მთვრალი იაკობი მირეკავდა ხოლმე (ალბათ, არა მხოლოდ მე) და საპატრიარქოს შიდა ამბებს მიყვებოდა — მათ შორის იმას, რომ შიო რუსეთის კაცია და ერთხელ კინაღამ სცემა. არასდროს მიკადრია, მისი ფარულად ჩაწერა. რადგან ეთიკის დაცვა ყოველთვის ყველაზე მნიშვნელოვანია ჩემთვის, იაკობისნაირებთანაც კი. ხოდა, ეს საუბრებიც არის გამოქვეყნებულ მასალებში", — წერს ის ფეისბუქგვერდზე.

მთავარი არხის გენერალური დირექტორი, ნიკა გვარამია აღნიშნულზე ამბობს, რომ ჩანაწერებში მისი და დეკანოზ მამალაძის საუბარია ასახული.

"მღვდლები და სინოდი იქეთ იყოს და ლამის ყველა ჩვენი ჟურნალისტის მიმოწერაა მასალებში. ჩემს ნაწილში, ყველაზე ამაზრზენი ჩემი და დეკანოზ მამალაძის სატელეფონო საუბრის კრებსია — ანუ, ადვოკატის და კლიენტის ურთიერთობა, რომელიც ფარულობის სრული პრივილეგიითაა კანონმდებლობით დაცული", — წერს ის.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.