მუზეუმები, ლამაზი ქუჩები, ისტორიული შენობები თუ ძეგლები — თითოეულ ქვეყანასა და ქალაქს სტუმრები განსხვავებული ღირსშესანიშნაობების ნახვის სურვილით სტუმრობენ. პოლონეთის ქალაქ გდანსკში ყველაზე პოპულარული ტურისტული წერტილი აივანია, რომელზეც ცნობისმოყვარე და მეგობრული ოქროსფერი რეტრივერი, სახელად მილკა ცხოვრობს.

ფოტო: Pjes z balkonu na rogu Politechnicznej i Bohaterów Getta Warszawskiego

ფოტო: Pjes z balkonu na rogu Politechnicznej i Bohaterów Getta Warszawskiego

"საყვარელი ძაღლი აივანზე" — ასე ჰქვია პოლონეთში დამთვალიერებლების საყვარელ ადგილს, რომელიც პოპულარული სულ ცოტა ხნის წინ გახდა. საქმე ისაა, რომ პირველი სართულის აივნიდან მუდმივად მილკა იჭყიტება და ადგილობრივებსა თუ ტურისტებს ესალმება.

"საყვარელი ძაღლი აივანზე" Google Maps-ზე 5 ვარსკვლავითაა შეფასებული, პოლონური საიტის მიხედვით, კი აივანი გდანსკის ღირსშესანიშნაობათა შორის პირველ ადგილზეა, ზოგადად ლოკაციებს შორის კი — მე-2 ადგილზე.

აღსანიშნავია, რომ "საყვარელი ძაღლი აივანზე" Google Maps-ზე მსოფლიოში ცნობილ ღირსშესანიშნაობებზე მაღალი ქულითაა შეფასებული, მაგალითად, ლუვრისა და თავისუფლების ქანდაკების შეფასება 4.7-ია, თუმცა, რა თქმა უნდა, მილკას შემთხვევაში შეფასებების რაოდენობა საგრძნობლად მცირეა.

თამამად შეიძლება ითქვას, რომ მილკა ინტერნეტსივრცის ახალი ვარსკვლავია. ტვიტერზე უამრავი ადამიანი წერს, რომ პოლონეთში ჩასვლა და მეგობრული ცუგას მონახულება უნდათ.

ფოტო: Pjes z balkonu na rogu Politechnicznej i Bohaterów Getta Warszawskiego

"ღმერთო ჩემო, ხვალვე გდანსკში მივდივარ, მადლობა".

ნამდვილად რთულია, ამ კომენტარის ავტორს არ დავეთანხმოთ!