ქართული ოცნების დეპუტატის, შალვა პაპუაშვილის განცხადებით, ერთადერთი, რაც ექსპრეზიდენტის, მიხეილ სააკაშვილის ჩამოსვლასთან დაკავშირებით დარჩა, არის ხალხის ემოციები მის მიმართ — ზოგს უხარია, ზოგი კი ბრაზობს. ამის შესახებ მან პალიტრანიუსის ეთერში ისაუბრა და ასე უპასუხა ჟურნალისტის კითხვას: "თქვენი აზრით, სააკაშვილი ჩამოვა არჩევნებამდე?"

"სიმართლე გითხრათ, ამასთან დაკავშირებით უკვე, მე მგონი, აღარავის აზრი აღარ აქვს, ყველას აქვს ემოცია. ზოგს უხარია, მის მხარდამჭერებს და შემდეგ ექნებათ იმედგაცრუება, ზოგი ბრაზობს, ზოგი იცინის, ზოგი ხუმრობს, არანაირი მოსაზრება აღარ არსებობს. ერთადერთი, რაც არის სააკაშვილისგან, ეს არის დარჩენილი ემოციები მის მიმართ, მორჩა", — აცხადებს პაპუაშვილი.

მიხეილ სააკაშვილმა 6 სექტემბერს ისევ განაცხადა, რომ საქართველოში ჩამოვა, თუმცა თარიღს ისევ არ აკონკრეტებს. მისი თქმით, თარიღსა და მარშრუტთან დაკავშირებით მოსახლეობას საქმის კურსში მაშინ ჩააყენებს, როცა ყველაფერი ხელთ ექნება. ექსპრეზიდენტმა თქვა ისიც, რომ მის წინააღმდეგ აღძრულია ე.წ. სისხლის სამართლის საქმე, თუმცა დაპატიმრების არ ეშინია.

ეს პირველი შემთხვევა არ არის, როდესაც სააკაშვილი საქართველოში დაბრუნებაზე საუბრობს. იმავეს ამბობდა ის წინა არჩევნების პერიოდშიც და ეს რამდენჯერმე დააანონსა ახლაც, თვითმმართველობის არჩევნებამდე. მას ზუსტი თარიღი არც აქამდე უთქვამს, თუმცა აცხადებდა, რომ პირობას შეასრულებდა და "რეფერენდუმის" წინ საქართველოში ჩამოვიდოდა. სააკაშვილის ჩამოსვლასთან დაკავშირებით განცხადებებზე საუბრისას მმართველ პარტიას არაერთხელ უთქვამს, რომ მას ქვეყანაში შემოსვლის შემთხვევაში დააკავებენ. მიხეილ სააკაშვილის მიმართ არაერთი გამამტყუნებელი განაჩენი არსებობს საქართველოში და მასზე ქართველ სამართალდამცავებს ძებნა აქვთ გამოცხადებული. სააკაშვილის ჩამოსვლის შემთხვევაში მის დაპატიმრებაზე არაერთხელ უსაუბრია ქვეყნის პრემიერმინისტრს, ირაკლი ღარიბაშვილსაც.