ექსპრეზიდენტი მიხეილ სააკაშვილი კვლავ ამბობს, რომ საქართველოში ჩამოვა, თუმცა თარიღს ისევ არ აკონკეტებს. მისი თქმით, თარიღსა და მარშრუტთან დაკავშირებით მოსახლეობას საქმის კურსში მაშინ ჩააყენებს, როცა ყველაფერი ხელთ ექნება. სააკაშვილი სხვებსაც მოუწოდებს, რომ არჩევნების დღეებში აიღონ შვებულება და საქართველოში "ხმელეთით, ჰაერით" წამოვიდნენ საქართველოში.

"პირადად მე ჩავალ ამ არჩევნებზე საქართველოში და ასევე მინდა მოვუწოდო ყველა უცხოეთში მყოფ თანამემამულეს, ვისაც გაქვთ ამის საშუალება, არჩევნების დღეებში აიღეთ შვებულება, გადადეთ ამისთვის თქვენი დრო, საშუალებები და ვისაც როგორ შეგიძლიათ ჩასვლა ხმელეთით, ჰაერით, წავიდეთ ყველა ერთად საქართველოში", — აცხადებს სააკაშვილი ვიდეო მიმართვაში.

ექსპრეზიდენტმა თქვა ისიც, რომ მის წინააღმდეგ აღძრულია ე.წ. სისხლის სამართლის საქმე, თუმცა დაპატიმრების არ ეშინია.

"მე არც მათი დაპატიმრების არ მეშინია. დარწმუნებული ვარ, ქართველი ხალხი გაითავისუფლებს საკუთარ თავსაც და გამათავისუფლებს მეც. მე არ მეშინია, ჩემი ბედი გადავცე ქართველი ხალხის ხელში", — ამბობს სააკაშვილი.

მისივე მტკიცებით, "არანაირი რევანში არ იქნება", მაგრამ ამის პარალელურად, "ივანიშვილი მოიტანს უკან ყველა მოპარულ კაპიკს".

"ის აუნაზღაურებს თითოეულ ქართველს იმ ზარალს, რომელიც მიაყენა; ის აუნაზღაურებს ზარალს იმ შვილებს, რომელთაც დედები გაუქცია უცხოეთში, მამები გაუქცია უხოეთში; ის აუნაზღაურებს ზარალს ჩვენი გლეხობის, რომელიც ვერ ასაღებდა მრავალი წელი თავის პროდუქციას, რომელსაც ფასები დაუვარდა; ის აუნაზღაურებს ზარალს მეანაბრეებს და იმ ხალხს, ვინც აიღო კრედიტი და პრაქტიკულად გაუფასურდა, ვერ აბრუნებს ამ კრედიტს იმის გამო, რომ ვალუტა ორჯერ და მეტჯერ დაეცა; ის აუნაზღაურებს ზარალს იმ ხალხს, ვინც დაკარგა სამსახურები და ვინ დარჩა ელემენტარული შემოსავლის გარეშე; ის აუნაზღაურებს წამლის ფულს, გაძვირებულის, თითოეულ ადამიანს, ვისაც ეს წამალი სჭირდება; ის აუნაზღაურებს იმ ადამიანებს დანაკარგს, თუნდაც მატერიალურს, ვინც დაკარგა ოჯახის წევრები იმის გამო, რომ საქართველო ერთდერთი ქვეყანაა მსოფლიოში, სადაც კოვიდით სიკვდილიანობა ორჯერ გაიზარდა ივანიშვილის მიერ მიღებული გადაწყვეტილებების და იმ უმოქმედობის გამო, რომელიც ასევე გამოიწვია ივანიშვილის შეგნებულმა მავნებლობამ და ქართველი ერის გენოციდის მცდელობამ", — განაცხადა მან.

სააკშვილმა ასევე, თქვა, რომ ძალადობა და არეულობა არ უნდა, მაგრამ უნდა მომავალი.

"ჩვენ უნდა შევუბრინოთ მათ ხელი, თუ ისინი გადავიდნენ ძალადობაზე", — განაცხადა ექსპრეზიდენტმა.

ეს პირველი შემთხვევა არ არის, როდესაც სააკაშვილი საქართველოში დაბრუნებაზე საუბრობს. იმავეს ამბობდა ის წინა არჩევნების პერიოდშიც და ეს რამდენჯერმე დააანოსნა ახლაც, თვითმმართველობის არჩევნებამდე. მას ზუსტი თარიღი არც აქამდე უთქვამს, თუმცა აცხადებდა, რომ პირობას შეასრულებდა და "რეფერენდუმის" წინ საქართველოში ჩამოვიდოდა. სააკაშვილის ჩამოსვლასთან დაკავშირებით განცხადებებზე საუბრისას მმართველ პარტიას არაერთხელ უთქვამს, რომ მას ქვეყანაში შემოსვლის შემთხვევაში დააკავებენ. მიხეილ სააკაშვილის მიმართ არაერთი გამამტყუნებელი განაჩენი არსებობს საქართველოში და მასზე ქართველ სამართალდამცავებს ძებნა აქვთ გამოცხადებული.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.