ნაციონალური მოძრაობის ერთ-ერთი ლიდერი, ხატია დეკანოიძე ვანში წარდგენაზე მომხდარ ინციდენტთან დაკავშირებით გამოკითხვაზე დაიბარეს. როგორც ის On.ge-სთან ჰყვება, გუშინ, 11 სექტემბერს უცნობმა პირებმა შეთანხმებული ოპოზიციის ვანის მერობის კანდიდატის წარდგენის ჩაშლა სცადეს.

"წარდგენის დროს რამდენჯერმე ჩამოიარა მანქანამ, გაჩერდა შტაბთან, წარდგენის წინ და ღიად შეურაცხყოფას ჰქონდა ადგილი, თუმცა ამით არ გაჩერდა და რამდენჯერმე აიარ-ჩამოიარა სიგნალით. შემდეგ ხელჩართულ ბრძოლაში ჩაერთო. ამას უყურებდა პოლიცია და სანამ მე არ ვუთხარი პოლიციას, რომ გააჩერეთ ეს ადამიანები-მეთქი, მანამდე რეაგირება არ ჰქონდათ. როგორც მე გავარკვიე, ერთ-ერთი არის ვინმე ადგილობრივი კრიმინალური ავტორიტეტი და მეორე არის კონკრეტული აიპის თანამშრომელი", — განაცხადა მან.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.