ნაციონალური მოძრაობის ლიდერის, ნიკა მელიას თქმით, ის ყოფილ პრემიერმინისტრთან, გიორგი გახარიასთან ერთ სივრცეში ყოფნასაც კი გამორიცხავს მანამ, სანამ გახარიამ 20 ივნისისა და ია კერზაიას საქმეზე არსებულ კითხვებს პასუხს არ გასცემს.

"ადამიანი, რომლის კისერზედაც არის 20 ივნისი, ადამიანი რომლის კისერზე არის ია კერზაიას სიკვდილი, ბაჩანა შენგელიას დედის. მეტი ახლა, მე როგორ შეიძლება რაიმე თანამშრომლობა მქონდეს ამ ადამიანთან. [...] სანამ ეს ადამიანი არ იტყვის რა მოხდა 20 ივნისს, მან გასცა ბრძანება თუ არ გასცა, რა მოხდა ია კერზაიასთან დაკავშირებით მე აბსოლუტურად გამოვრიცხავ, პირდაპირ გეუბნებით ერთ სივრცეში ყოფნასაც კი", — აღნიშნა ნიკა მელიამ.

20-21 ივნისის მოვლენების დროს დაშავებული 275 ადამიანიდან პროკურატურამ დაზარალებულად მხოლოდ 85 ადამიანი ცნო. აქედან 78 შს სამინისტროს თანამშრომელია, ხოლო 7 — სამოქალაქო პირი.

საია-ში აცხადებენ, რომ 22 პირიდან, რომელსაც ისინი სამართლებრივად ეხმარებიან, 20-ს ამ დრომდე არ აქვს მინიჭებული დაზარალებულის სტატუსი. მათ შორის, დაგვიანებით ცნეს დაზარალებულად მაკო გომური და გიორგი სულაშვილი, რომლებმაც 20 ივნისის ღამეს თვალი დაკარგეს.

ზუგდიდის სკოლის ყოფილი დირექტორი, ია კერზაია წინსაარჩევნო პერიოდში მიღებული ინსულტის შედეგად 2018 წლის 9 დეკემბერს გარდაიცვალა. სკოლის დირექტორზე ზეწოლაზე დღემდე საუბრობენ გარდაცვლილის ოჯახის წევრები და ოპოზიცია.

მანამდე ია კერზაია რუსთავი 2-თან ჰყვებოდა, რომ მას შემდეგ რაც არჩევნებში პედაგოგების ჩართვაზე უარი თქვა, ანონიმური წერილის საფუძველზე სკოლაში გენერალური ინსპექციის ორი თანამშრომელი ჩავიდა და სკოლა შეამოწმა. რუსთავი 2-ის ინფორმაციით, შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი. ამ მიზეზის გამო კი თანამდებობიდან დირექტორის გათავისუფლებას აპირებდნენ.

მაშინდელი შინაგან საქმეთა მინისტრი გიორგი გახარია იყო. მან ამ თემაზე კომენტარი 21 დეკემბერს გააკეთა და აღნიშნა, რომ ადამიანური ტრაგედიის გარდაცვალებისა და სიკვდილის პოლიტიკური მიზნებისთვის გამოყენება, უბრალოდ ამორალურია.