საქართველოს შინაგან საქმეთა მინისტრი, გიორგი გახარია ამბობს, რომ ადამიანური ტრაგედიის გარდაცვალებისა და სიკვდილის პოლიტიკური მიზნებისთვის გამოყენება, უბრალოდ ამორალურია. ასე გამოეხმაურა გიორგი გახარია ახალქალაქში ნაციონალური მოძრაობის წევრებსა და მხარდამჭერებზე თავდასხმის საქმეს, ასევე ზუგდიდის სკოლის დირექტორი, ია კერზაიას გარდაცვალებას. გაერთიანებული ოპოზიცია ქართული ოცნების მხრიდან მასზე ზეწოლაზე საუბრობდა.

"ერთი რაღაცის მეშინია, გულწრფელად გეუბნებით, ყველანაირი თვალთმაქცობის გარეშე, ეს პოლიტიკური მიზნებისთვის მსგავსი თემების გამოყენებაა. პირადად გპირდებით ერთ საქმესაც და მეორესაც დავამთავრებ და შემდგომ სპეციალურად ამ თემებისთვის მოვალ აქ. და თუ თქვენ გეყოფათ ვაჟკაცობა ასე დაჯდეთ და ან ერთ ან თემაზე ვისაუბრობთ, მერე უბრალოდ შეგრცხვებათ", — განაცხადა გიორგი გახარიამ.

ზუგდიდის მე-6 საჯარო სკოლის დირექტორსა და ამავე სკოლის პერსონალზე განხორციელებული სავარაუდო ზეწოლის ფაქტებთან დაკავშირებულ განცხადებაზე ბაჩანა შენგელია სამშაბათს, 25 დეკემბერს გამოიკითხება.

ზუგდიდის სკოლის დირექტორი, ია კერზაია ინსულტის დიაგნოზით საავადმყოფოში გადაიყვანეს, თუმცა მისი გადარჩენა ვერ მოხერხდა და ის 9 დეკემბერს გარდაიცვალა.

სკოლის დირექტორზე ზეწოლაზე საუბრობენ გარდაცვლილის ოჯახის წევრები და ოპოზიცია. აღნიშნულ საკითხს გამოეხმაურა განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი და აღნიშნა, რომ ამ საქმის პოლიტიზირება მიუღებელია