18-წლიანი ლოდინის შემდეგ მატრიცას მე-4 ნაწილის — The Matrix Resurrections-ის პრემიერის თარიღი ცნობილია. 22 დეკემბერს ჩვენი საყვარელი გმირები — ნეო და ტრინიტი გვიბრუნდებიან. როგორც იქნა, ახალი ფილმის პირველი შთამბეჭდავი ტრეილერიც აქაა:

"გავგიჟდი?" — ტრეილერის დასაწყისში ნეოს ტომასი ჰქვია და ფსიქოთერაპევტს თავის უცნაურ სიზმრებზე უყვება. ტრეილერში ვხედავთ, რომ ნეო ცისფერ აბებს იღებს. როგორც ჩანს, ნეოსა და ტრინიტის პირველ სამ ფილმში მომხდარი მოვლენების შესახებ აღარაფერი ახსოვთ.

ნეო საბედისწერო არჩევანის წინაშე კიდევ ერთხელ აღმოჩნდება და ამჯერად წითელ აბს ირჩევს.

ტრეილერი სავსეა მასშტაბური ბრძოლის სცენებით, მაღალი შენობებიდან გადმოხტომით, აფეთქებებითა და, რა თქმა უნდა, ჩვენი საყვარელი გმირების დაბრუნების ნოსტალგიით!

ახალ ფილმში კიანუ რივზი, კერი-ენ მოსი, იაია აბდულ მატინი, პრიანკა ჩოპრა, ნილ პატრიკ ჰარისი, კრისტინა რიჩი, ჯესიკა ჰენვიკი და სხვები მონაწილეობენ. ტრეილერიდან აშკარაა, რომ გულშემატკივრებს წინ მშვენიერი სანახაობა ელით!

აღსანიშნავია, რომ პირველი ტრეილერის გამოსვლამდე გულშემატკივრებს საოცარი სიურპრიზი დახვდათ: შეიქმნა სპეციალური საიტი, რომელიც ლურჯ და წითელ აბებს შორის არჩევანს გთავაზობთ, შემდეგ კი მე-4 ნაწილის თიზერებს გიჩვენებთ.

WhatIsTheMatrix.com-ზე შესვლისას წითელ და ლურჯ აბებს შორის არჩევანი უნდა გააკეთოთ. ლურჯი აბის არჩევის შემთხვევაში, იმ სამყაროში დარჩებით, რომელსაც მთელი ცხოვრებაა იცნობთ. თუ წითელ აბს აირჩევთ — რეალობისთვის თვალის გასწორება მოგიწევთ.

ვებგვერდზე შესვლისას არჩევანის გაკეთების შემდეგ ახალი ფილმიდან სხვადასხვა სცენების ნახვას შეძლებთ. თუ ლურჯ აბს აირჩევთ, ნილ პატრიკ ჰარისის ხმას გაიგებთ: "გახსოვს, აქ როგორ მოხვდი? შენ რეალობის ფანტაზიისგან გარჩევის უნარი დაკარგე".

წითელი აბის არჩევის შემთხვევაში, იაია აბდულ მატინი კი რეალობას დაგანახებთ.

მატრიცა ეკრანებზე პირველად 1999 წელს გამოვიდა და პოპულარულობას დღემდე ერთ-ერთ ყველაზე პოპულარულ ნამუშევრად რჩება. ფილმის მე-2 და მე-3 ნაწილები 2003 წელს გამოვიდა.