ქართული ოცნების დეპუტატი, ირაკლი ზარქუა აცხადებს, რომ პარტიას "ათობით ათასი წევრი და ასობით ათასი მხარდამჭერი ყავს და ყველას ზრახვებსა, თუ ფიქრებზე" პასუხს ვერ აგებენ. ასე ეხმაურება ის სოციალურ ქსელში მედიაში გავრცელებულ ინფორმაციას, რომ შანაე ბრუკის მკვლელობაში ბრალდებული მმართველი პარტიის წევრი იყო.

სოციალურ ქსელებში გავრცელდა ფოტოებიც, სადაც ირაკლი ზარქუა ბრუკის მკვლელობაში ბრალდებულთან ერთად არის დაფიქსირებული. On.ge აღნიშნულზე დეპუტატს დაუკავშირდა, მისი თქმით, ფოტოები ორი-სამი წლის წინანდელია. ჩვენ კითხვაზე, იყო თუ არა ბრალდებული ქართული ოცნების აქტივისტი ან საოლქო კომისიის წევრი, ის გვპასუხობს, რომ არ იცის.

"არ ვიცი, ამდენი არ ვიცი. პარტიის წევრიც იყო, თუ არ იყო, ეგეც არ ვიცი, სიმართლე გითხრათ. უბრალოდ, იქ იყო მთაწმინდის უბანზე, ეხმარებოდა ჯგუფს, გვეხმარებოდა შეხვედრის დაორგანიზებაში. დანარჩენი იმის იქით არც ვიცი მე, უბრალოდ, ერთკვირიანი მუშაობა გვქონდა უბანზე, მივლინებული ვიყავი და ეგ არის და ეგ", — განაცხადა მან.

მისივე თქმით, "პარტიულობას მნიშვნელობა არ აქვს" და ყველამ, ვინც დანაშაული ჩაიდინა, პასუხი უნდა აგოს.

"მნიშვნელოვანია ის, რომ მიუხედავად იმისა, რომ შეიძლება ჩვენი გუნდის აქტივისტი ყოფილიყო, მაინც შინაგან საქმეთა სამინისტრომ მტკიცებულებების ერთობლიობით მიიღო ეს ღონისძიება ჩაატარა და დააკავა პოტენციური დამნაშავე. ახლა სასამართლომ უნდა გადაწყვიტოს, თუ დამნაშავეა უნდა მიესაჯოს უმკაცრესად, ბუნებრივია, იმიტომ, რომ ის რაც მოხდა, ეს არის ტრაგედია, მიუტევებელია ეს ყველაფერი", — აღნიშნა ზარქუამ.

შინაგან საქმეთა სამინისტროს განცხადებით, ავსტრალიის მოქალაქის, შანაე ბრუკის მკვლელობის საქმე გახსნეს და ბრალდებული დააკავეს. მათივე ინფორმაციით, 1988 წელს დაბადებული, თბილისში მცხოვრები საქართველოს მოქალაქე, რ.მ. 8 სექტემბერს დააკავეს. მისი დაკავების შემდეგ, მედიაში გავრცელდა ინფორმაცია, რომ ბრალდებული ქართული ოცნების წევრი იყო. On.ge აღნიშნულის გადამოწმებას პრესსამსახურთან ცდილობს, თუმცა ჩვენს ზარებს ამ დრომდე არ პასუხობენ.

31 ივლისს გავრცელდა ინფორმაცია, რომ თბილისში დაკარგული ავსტრალიის მოქალაქე, შანაე ბრუკი მთაწმინდის ფერდობზე გარდაცვლილი იპოვეს.

შანაე ბრუკის მეგობრები Facebook-ზე წერდნენ, რომ ის 30 ივლისს დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუკი ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებისთვის ყვიროდა.

1-ლ აგვისტოს შანაე ბრუკი გარდაცვალების საქმე განზრახ მკვლელობის მუხლით გადაკვალიფიცირდა.