ვიეტნამელ კაცს სასამართლომ "საშიში ინფექციური დაავდების გავრცელების" ბრალდებით 5-წლიანი პატიმრობა მიუსაჯა. სასამართლოს განცხადებით, პირმა კორონავირუსი 8 ადამიანს გადასდო, რომელთაგან ერთი დაიღუპა.

ვიეტნამში მკაცრი კოვიდრეგულაციები მოქმედებს. ქვეყანაში ეპიდსიტუაცია დელტა ვარიანტის გავრცელების შემდეგ გაუარესდა. დღემდე ვიეტნამში კორონავირუსით დაღუპულთა რიცხვი 13 ათასს აჭარბებს. გარდაცვლილთა რიცხვი ბოლო თვეების განმავლობაში განსაკუთრებულად გაიზარდა.

ივლისში ბრალდებული კორონავირუსის გავრცელების ერთ-ერთი ეპიცენტრიდან მშობლიურ ქალაქში გაემგზავრა. ქალაქში დაბრუნებისას მან მგზავრობის ისტორიის შესახებ იცრუა, შემდეგ კი თვითიზოლაციის წესებიც დაარღვია. არსებული რეგულაციის მიხედვით, კაცს 21-დღიანი კარანტინი უნდა გაევლო.

მოგვიანებით ბრალდებულს კორონავირუსი დაუდასტურდა. გამოძიებამ აგრეთვე დაადგინა, რომ მან ვირუსი 8 ადამიანს გადასდო, რომელთაგან ერთი პირი ერთთვიანი მკურნალობის შემდეგ გარდაიცვალა. ბრალდებული $880-ით დაჯარიმა და 5-წლიანი პატიმრობა მიესაჯა.