პარტია საქართველოსთვის ლიდერის, გიორგი გახარიას განცხადებით თბილისის მოქმედი მერი, კახა კალაძე "სიმართლეს ვერ ამბობს და ტყუილსაც უნდა, რომ თავი აარიდოს". ასე ეხმაურება ის კალაძის განცხადებას, სადაც მან თქვა, რომ ქართული ოცნების თავმჯდომარე, ირაკლი კობახიძე არ ტყუის, როცა ამბობს, რომ გახარია ფინანსების სანაცვლოდ კანდიდატურას არ დააყენებდა.

"კახა დღეს ვერც სიმართლეს ვერ ამბობს ბოლომდე და ტყუილსაც რაღაცნაირად უნდა, რომ თავი აარიდოს, ამან გააჩინა კითხვები. სიმართლე უნდა თქვას, რაც იქ იყო — რომ იქ არაფერი არ ყოფილა და იყო ჩვეულებრივ ორ ადამიანს შორის საუბარი", — განაცხადა გახარიამ TV პირველის ეთერში.

ჟურნალისტმა მას დამატებით ჰკითხა: "არსებობდა თუ არა შუამავალი, როგორც პარტიის თავმჯდომარე ამბობს და იყო თუ არა, შუამავლის საშუალებით გზავნილები გაკეთებული, რომ თქვენ გარკვეული თანხის სანცვლოდ, მზად იყავით მის კონკურენტობაზე უარი გეთქვათ", რაზეც გახარიამ უპასუხა:

"ეს არის ის ტყუილი, რომელსაც კახა, რაღაცნაირად ცდილობს, რომ თავი აარიდოს და მერე ამბობს, რომ ჩემთან ამაზე საუბარი არ ყოფილაო, მაგრამო პარტიის თავმჯდომარე არ ტყუისო. თითქოს ახლა, პარტიის თავმჯოდმარე ლენინი იყოს".

გახარია აღნიშნავს იმასაც, რომ აქამდე კალაძეს ძალიან დიდ პატივს სცემდა, თუმცა ახლა "რაღაცები შეიცვალა".

1-ლ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".

იმავე დღეს ქართული ოცნების თავმჯდომარემ, ირაკლი კობახიძემ განაცხადა, რომ ქართული გახარიას მხრიდან მინიშნებები იყო იმასთან დაკავშირებით, რომ თუ "ოცნების" მხრიდან ფინანსური მხარდაჭერა იქნებოდა, ექსპრემიერი თავის კანდიდატურას არ წამოაყენებდა.

გაიგეთ მეტი: