ფოთის მერობის კანდიდატის, გიგი უგულავას შეფასებით, გიორგი გახარიას განცხადებებით ჩანს, რომ ის იბრძვის დაიკავოს ადგილი ივანიშვილის "ფრთის და მზის ქვეშ". თუმცა უგულავა განმარტავს, რომ მნიშვნელოვანია არჩევნებში მოსახლეობამ შემოხაზოს ნებისმიერი, გარდა 41-სა.

"რეფერენდუმი შედგება იმ შემთხვევაში, თუ ჩვენი მოქალაქეების უდიდესი უმრავლესობა მივა და შემოხაზავს ნებისმიერს, გარდა 41-ისა. ზუსტად ეს არის რეფერენდუმის ფორმულა. შეიძლება მე ერთი პარტია მომწონდეს, თქვენ მეორე პარტია მოგწონდეთ, მნიშვნელობა არ აქვს. პარტიები იყოს, რომელიც ფუნდამენტურად მიუღებელია, მაგალითად იგივე გახარიას პარტიას მე ჯერჯერობით ბოლომდე ოპოზიციურ პარტიად ვერ ვუწოდებდი, იმის გამო, რომ მისივე განცხადებებიდან ჩანს, რომ ის იბრძვის დაიკავოს ივანიშვილის ფრთის და მზის ქვეშ უკეთესი ადგილი, ვიდრე დღეს დაკავებული აქვს კობახიძეს და ღარიბაშვილს. ჩვენ არ ვიბრძვით იმისთვის, რომ ივანიშვილის რეჟიმის დეკორაციული ცვლილებები მოხდეს, ივანიშვილის რეჟიმი ბოლომდე არის ამოსაძირკვი თუ გვინდა გადავიდეთ რეალურ კოალიციურ მმართველობაზე", — თქვა გიგი უგულავამ ფორმულას ეთერში.

გიგი უგულავას თქმით, გახარიას ძალადობაზე მესამე პირში არ უნდა საუბრობდეს, რადგან მის სახელს კონკრეტული საქმეები უკავშირდება.

"გახარიას მიმართ არსებობს უმძიმესი შეკითხვები. ის მესამე პირში რომ ლაპარაკობს იმ პოლიტიკურ დევნაზე, დაავიწყდა, რომ ის იყო პოლიტიკური დევნის შემოქმედი და შინაგან საქმეთა მინისტრი? მე მარტო 20 ივნისზე არ ვლაპარაკობ — იარაღის ჩადება მის ეპოქაში მოხდა, უბედურებები და დატერორებები და ია კერზაიას საქმე. ასე მესამე პირში ძალადობაზე ნუ ლაპარაკობს", — აღნიშნა გიგი უგულავამ.

უგულავამ ასევე ისაუბრა თვითმმართველობის არჩევნების მნიშვნელობაზე და ხაზი გაუსვა, რომ ეს არის რეფერენდუმი. მისი თქმით ქართული ოცნება უნდა დარჩეს 43%-იანი ბარიერის მიღმა და ეს იქნება გარანტია, რომ დაინიშნება რიგგარეშე არჩევნები.

28 ივლისს "ოცნებამ" შარლ მიშელის შეთანხმება ანულირებულად გამოაცხადა. ქართული ოცნების თავმჯდომარემ, ირაკლი კობახიძემ, განაცხადა, რომ შეთანხმებას მხოლოდ ისინი ასრულებდნენ კეთილსინდისიერად, რაც არასწორია. მათი აზრით, 100 დღეში თავი ამოწურა დოკუმენტმა, რომლის გამოც შარლ მიშელი და კრისტიან დანიელსონი საქართველოს არაერთხელ ეწვივნენ და რომლის მიღებაშიც არაერთი ქვეყნის ელჩი იყო ჩართული. ეს დოკუმენტი ხუთ პუნქტს მოიცავდა, ერთ-ერთი მთავარი საკითხი კი ადგილობრივი თვითმმართველობის არჩევნებზე 43%-იანი დათქმა იყო — თუ მმართველმა პარტიამ პირობა დადო, თუ არჩევნებზე ამ მაჩვენებელზე ნაკლებს აიღებდა, ვადამდელ საპარლამენტო არჩევნებს დანიშნავდა, რასაც ოპოზიცია 2020 წლის პარლამენტის არჩევნების შემდეგ ითხოვს.