თბილისის მოქმედი მერი და ქართული ოცნების მერობის კანდიდატი, კახა კალაძე აცხადებს, რომ ყოფილ პრემიერმინისტრთან, გიორგი გახარიასთან შეხვედრის მიზეზები და მიზანი ვერ გაიგო. მისი თქმით, შეხვედრის სურვილი თავად გახარიამ გამოთქვა, რის შემდეგაც კალაძემ მერიაში მისვლა შესთავაზა.

"მოვიდა მერიაში, განხორციელდა შეხვედრა. გუშინ დილით მოხდა ეს შეხვედრა, მთავრობის სხდომამდე რამდენიმე წუთით ადრე. დიახ, თავად [დამირეკა]. ჩემთან არანაირი კომუნიკაცია არ ყოფილა [მანამდე]. სიმართლე გითხრათ, ვერაფერი ვერ გავიგე შეხვედრის მიზანი, მიზეზი. ერთადერთი რაც ითქვა შეხვედრაზე, ეს იყო, რომ ის აყენებდა კანდიდატურას და არ უნდოდა ეს ტელევიზიით გამეგო, თავად გადაწყვიტა, რომ მას ეთქვა ეს ყველაფერი. დანარჩენი, გულწრფელად გეტყვით, ვერ გავიგე ვერაფერი", — აცხადებს ის.

შეხვედრის შესახებ ინფორმაცია ქართული ოცნების ლიდერებმა მას შემდეგ გაავრცელეს, რაც გახარიამ თქვა, რომ თბილისის მერობისთვის იბრძოლებს. ირაკლი კობახიძემ, მამუკა მდინარაძემ და კახა კალაძემ თქვეს, რომ გახარიას კალაძესთან კომუნიკაციის რამდენიმე მცდელობა ჰქონდა და საბოლოოდ, შეხვედრა პირველ სექტემბერს, თბილისის მერიაში შედგა. მეტიც, კობახიძე და მდინარაძე საუბრობენ იმაზე, თითქოს გახარია მზად იყო, ქართული ოცნების მხრიდან ფინანსური დახმარების სანაცვლოდ საკუთარი კანდიდატურა არ დაეყენებინა. თავად გახარიამ ქართული ოცნების ლიდერების ამ განცხადებებს ტყუილი უწოდა და თქვა, რომ მათ სიტყვას ფასი არ აქვს.

პირველ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".